ملک بھر میں عیدالاضحی مذہبی عقیدت و احترام اور جوش وجذ بہ کے ساتھ منائی گئی

اتوار 8 جون 2025 00:10

اسلام آباد (اُردو پوائنٹ اخبارتازہ ترین - اے پی پی۔ 08 جون2025ء) سنت ابراہیمی کی یاد میں ہفتہ کو ملک بھر میں عیدالاضحی مذہبی عقیدت و احترام اور جوش و جذ بہ کے ساتھ منائی گئی،صدر مملکت نے نماز عید ایوان صدر کی جامع مسجد میں اور وزیر اعظم شہباز شریف نے لاہور ماڈل ٹائون میں نماز عید ادا کی۔ ملک بھر کے تمام چھوٹے بڑے شہروں، قصبوں اور دیہات میں عید الاضحی کے بڑے بڑے اجتماعات منعقد ہوئے، وفاقی دارالحکومت اسلام آباد کی فیصل مسجد میں جبکہ لاہور کی بادشاہی مسجد میں نماز عید کا سب سے بڑا اجتماع ہوا، خیبر پختونخوا ، بلوچستان اور سندھ کے مختلف اضلاع میں بھی نماز عید کے اجتماعات میں قربانی کے فلسفہ پر روشنی ڈالی گئی۔

نماز عید کی ادائیگی کے بعد سنت ابراہیمی پر عمل کرتے ہوئے اللہ کی راہ میں جانور قربان کئے گئے۔

(جاری ہے)

عید کے اجتماعات میں قربانی کے فلسفہ کو اجاگر کیاگیا، دن کا آغاز مساجد میں امت مسلمہ کی فلاح وبہبود اور ملک کی سلامتی، ترقی اور خوشحالی کیلئے خصوصی دعاوں سے ہوا۔ملک بھر کے تمام شہروں ، قصبوں اور دیہات میں مساجد ، امام بارگاہوں، عید گاہوں اورکھلے مقامات پر نماز عید کے اجتماعات ہوئے۔

علمائے کرام نے اپنے عید کے خطبات میں سنت ابراہیمی کی اہمیت اور فلسفہ پرروشنی ڈالی۔ نماز عید کے بعد لوگوں نے سنت ابراہیمی کی پیروی کرتے ہوئے جانور قربان کئے۔ شہروں او رقصبوں میں میونسپل انتظامیہ نے عیدالاضحی کے تینوں روز کوڑا کرکٹ اور قربانی کے جانوروں کی آلائشیں ٹھکانے لگانے اور صفائی یقینی بنانے کے خصوصی انتظامات کر رکھے ہیں۔

سرکاری اور نجی چینلز پر عیدالاضحی کے حوالے سے خصوصی پروگرام نشر کئے گئے جبکہ اخبارات خصوصی ایڈیشن شائع ہوئے جن میں عیدالاضحی اور حضرت ابراہیم علیہ السلام کی سنت کو اجاگر کیا گیا۔ وفاقی دارالحکومت کی ضلعی انتظامیہ ، میونسپل کارپوریشن اسلام آباد کے سینی ٹیشن شعبہ نے موثر انداز مین الائشوں کو ٹھکانے لگایا پہلی مرتبہ ڈرون کیمروں کے ذریعے صفائی پلان کی مانیٹرنگ کی گئی ۔ پنجاب کے مختلف اضلاع میں بھی ڈرون کیمروں کا استعمال کرتے ہوئے صفائی پلان پر عملدرآمد کو یقینی بنایا گیا۔