علمائے کرام اور ماہرین صحت کا شدید گرمی کے دوران قربانی کے جانوروں کے حوالہ سے اخلاقی اصولوں پر زور

اسلام آباد (اُردو پوائنٹ اخبارتازہ ترین - اے پی پی۔ 09 جون2025ء) علمائے کرام اور ماہرین صحت نے کہا ہے کہ اسلامی دنیا کے اہم ترین مذہبی تہواروں میں سے ایک عیدالاضحیٰ قربانی اور عقیدت کے جذبے کی یاد تازہ کرتی ہے، شدید گرمی کے درمیان عیدالاضحیٰ نہ صرف قربانی اور عقیدت کا درس دیتی ہے بلکہ جانوروں کی فلاح و بہبود، عوامی تحفظ اور اخلاقی اصولوں پر بڑھتے ہوئے خدشات کی جانب توجہ مبذول کرنے کی ہدایت بھی کرتی ہے۔

انہوں نے کہا کہ خاص طور پر شہری علاقوں میں عید کے اجتماعات میں افراتفری نظر آتی ہے،جانوروں کی خریدو فروخت کی منڈیوں میں جانوروں کو مناسب طریقہ سے سنبھالا نہیں جاتا جس سے بعض اوقات انسانوں کے زخمی ہونے کے واقعات اور جانوروں کے مسائل میں بھی اضافہ ہو جاتا ہے۔

(جاری ہے)

بہت سے جانور جو جلد خریدے جاتے ہیں اور انہیں نامناسب حالات میں رکھا جاتا ہے۔

انہوں نے کہا کہ موثر نگرانی نہ ہونے کی وجہ سے بچے جانوروں کے پاس اکٹھے ہوتے ہیں جس سے جانور گھبراہٹ کی وجہ سے ان کو زخمی کر سکتے ہیں۔ ایک عالم دین مولانا ضمیر الحسن نے قربانی کے بنیادی جوہر پر روشنی ڈالتے ہوئے کہا کہ جانوروں کے ساتھ حسن سلوک کرنا صرف ہمدردی ہی نہیں بلکہ ایک مذہبی فریضہ بھی ہے، اللہ کے ہاں قربانی کی قبولیت کے لیے جانور کا صحت مند ہونا چاہئے ، اسکی اچھی دیکھ بھال کی جانی چاہئے اورمناسب طریقہ سے پیش آنا چاہیے۔

بیوپاری بھی اس کو صرف کاروبار نہ سمجھیں کیونکہ یہ عبادت ہے۔اسلام آباد سے تعلق رکھنے والے حذیفہ ملک جو منڈی میں قربانی کا جانور خریدنے آئے تھے ،انہوں نے بچوں کا جانوروں سے فاصلہ برقرار رکھنے کی اہمیت پر زور دیا اور کہا کہ پرہجوم منڈیوں میں اکثر شور اور چھیڑ چھاڑ کی وجہ سے جانور جارحانہ رویہ اپنا لیتے ہیں۔ انہوں نے کہا کہ بچوں کی نگرانی کی جانی چاہئے کیونکہ وہ غیر ارادی طور پر جانوروں کو بھڑکا سکتے ہیں۔

اسی طرح ایک اور خریدار نے کہا کہ ہم صبح سویرے منڈیوں کا دورہ کرنے کو ترجیح دیتے ہیں جب جانور پرسکون ہوں کیونکہ افراتفری کے ماحول میں بچوں کو نقصان پہنچ سکتا ہے۔اسلام آباد سے جانوروں کی صحت کے ماہر ڈاکٹر ارسلان رانا نے روشنی ڈالی کہ شہری ماحول جانوروں کی صحت کے لیے سنگین چیلنجز کا باعث ہے۔ زیادہ تر جانور گرمی اور خراب ہینڈلنگ کی وجہ سے تناؤ، پانی کی کمی اور انفیکشن کا شکار ہوتے ہیں۔

انہوں نے خبردار کیا کہ شدید موسم کی وجہ سے جانور گر سکتے ہیں یا جارحانہ ہو سکتے ہیں۔ جعلی دانتوں یا روئی کی بھرائی جیسی دھوکہ دہی کے طریقوں کو غیر اخلاقی حرکت قرار دیتے ہوئے انہوں نے خریداروں پر زور دیا کہ وہ جانوروں کے ڈاکٹروں سے مشورہ کریں یا جانوروں میں ہوشیاری، صاف جلد اور اچھی نقل و حرکت کی جسمانی علامات کا جائزہ لازمی لیں۔ انہوں نے زور دے کر کہا کہ قربانی کے جانور ایک مقدس عمل کا حصہ ہیں۔