راولپنڈی ویسٹ مینجمنٹ کمپنی کے عیدالاضحی پر صفائی کے بہترین انتظامات قابل تحسین اور لائق تقلید ہیں،بیرسٹر دانیال

عیدالاضحی کے موقع پر قربانی کے ساتھ ساتھ صفائی کو یقینی بنانا بھی ہر شہری کا فرض ہے، وفاقی پارلیمانی سیکرٹری اطلاعات کا بیان

پیر 9 جون 2025 14:25

راولپنڈی(اُردو پوائنٹ اخبارتازہ ترین - این این آئی۔ 09 جون2025ء)وفاقی پارلیمانی سیکرٹری برائے اطلاعات و نشریات بیرسٹر دانیال چوہدری نے کہا ہے کہ راولپنڈی ویسٹ مینجمنٹ کمپنی (آر ڈبلیو ایم سی) کی جانب سے عیدالاضحی کے موقع پر صفائی کے بہترین انتظامات قابل تحسین اور لائق تقلید ہیں۔ وزیر اعلیٰ پنجاب مریم نواز کی خصوصی ہدایات پر عمل کرتے ہوئے ’’ستھرا پنجاب پروگرام‘‘کے تحت راولپنڈی میں قربانی کے جانوروں کی باقیات اور آلائشوں کو بروقت اٹھانے، جراثیم کش ادویات کے اسپرے اور عوامی آگاہی مہم جیسے اقدامات قابل ذکر ہیں۔

اپنے ایک پیغام میں بیرسٹر دانیال چوہدری نے کہا کہ عیدالاضحی کے موقع پر قربانی کے ساتھ ساتھ صفائی کو یقینی بنانا بھی ہر شہری کا فرض ہے۔

(جاری ہے)

انہوں نے عوام سے اپیل کی کہ وہ قربانی کی آلائشیں مقررہ مقامات پر رکھیں اور ویسٹ بیگز کا استعمال یقینی بنائیں تاکہ شہر کو صاف ستھرا رکھا جا سکے۔ انہوں نے کہا کہ صفائی نصف ایمان ہے اور ایک مہذب معاشرے کی پہچان ہے کہ وہ اپنے اردگرد کے ماحول کو صاف اور خوشگوار رکھے۔

اپنے گھروں، گلیوں، محلوں اور پورے شہر کی صفائی ہمارا قومی و شہری فریضہ ہے تاکہ ہم سب مل کر ایک صحت مند ماحول تشکیل دے سکیں۔ انہوں نے شہریوں کو ہدایت کی کہ اگر صفائی کے حوالے سے کوئی شکایت ہو تو وہ فوراً راولپنڈی ویسٹ مینجمنٹ کمپنی کی ہیلپ لائن 1139 یا سوشل میڈیا پلیٹ فارمز کے ذریعے رابطہ کریں تاکہ فوری کارروائی کی جا سکے۔ انہوں نے اس بات پر زور دیا کہ عوامی تعاون ہی صفائی مہم کی کامیابی کا اصل ضامن ہے۔ ستھرا اور صحت مند پنجاب ہماری اجتماعی ذمہ داری ہے اور ہمیں اپنی نسلوں کے بہتر مستقبل کے لیے اس مہم میں بھرپور شرکت کرنی چاہیے۔