عید کے تین ایام کے دوران2 ہزار 372 ٹن آلائشوں کو ٹھکانے لگایا ،ڈپٹی کمشنر اسلام آباد

پیر 9 جون 2025 22:00

اسلام آباد (اُردو پوائنٹ اخبارتازہ ترین - اے پی پی۔ 09 جون2025ء) وفاقی دارالحکومت میں عید کے تین ایام کے دوران2 ہزار 372 ٹن آلائشوں کو ٹھکانے لگایا گیا۔ ڈپٹی کمشنر اسلام آباد عرفان نواز میمن نے آپریشن کی کامیاب تکمیل پر اپنے بیان میں کہا کہ اسلام آباد کی ضلعی انتظامیہ تعاون پر شہریوں کی مشکور ہے۔عید الاضحیٰ پر چھوٹے بڑے 1 لاکھ 39 ہزار 260 جانوروں کی آلائشیں تلف کی گئیں، سیف سٹی میں قائم کنٹرول روم کو ملنے والی تمام 300 شکایات پر فوری ایکشن لیا گیا۔

ڈپٹی کمشنر اسلام آباد نے تمام افسران و عملے کو اپنوں سے دور ڈیوٹی کرنے پر شاباش دی جن کی کوششوں سے عید کی صبح 10 بجے شروع ہونے والا آلائشیں اٹھانے کا عمل اختتام کو پہنچا۔ ڈپٹی کمشنر اسلام آباد عرفان نواز میمن نے کہا کہ ٹیمیں سیکٹر اور نان سیکٹر ہر علاقے میں بلا تفریق پہنچیں، قربانی کی تمام جگہوں کو عرق گلاب سے فنائل سے دھویا گیا۔

(جاری ہے)

انہوں نے کہا کہ تھرڈ پارٹی، کنٹرول روم اور ڈرون کیمروں کی مدد سے آپریشن کی نگرانی کی گئی، تھرڈ پارٹی انسپکشن میں رورل ایریاز کے 500 مقامات کی نشاندہی پر ایکشن لیا گیا۔ ڈپٹی کمشنر نے کہا کہ اس سارے عمل میں اسلام آباد کے شہریوں کا تعاون قابل تحسین رہا۔ عرفان نواز میمن نے کہا کہ شہر بھر میں صفائی آپریشن جاری رہے گا تاکہ کوئی کسر باقی نہ رہے، شہریوں سے التماس ہے کہ کسی بھی قسم کی شکایت ہو تو کنٹرول روم پر فی الفور آگاہ کریں۔