گورنر فیصل کریم کنڈی کی بیلجیئم کے سابق وزیراعظم ایلیو ڈی روپو سے ملاقات

جمعہ 22 اگست 2025 19:26

پشاور (اُردو پوائنٹ اخبارتازہ ترین - اے پی پی۔ 22 اگست2025ء) گورنر خیبر پختونخوا فیصل کریم کنڈی نے بیلجیئم کے سابق وزیراعظم اور رکن یورپی پارلیمنٹ ایلیو ڈی روپو (Elio de Rupo) سے ملاقات کی۔ گورنر ہاؤس پشاور سے جاری کردہ رپورٹ کے مطابق ملاقات میں دو طرفہ تعلقات، موسمیاتی تبدیلی کے مضمرات اور دیگر باہمی دلچسپی کے امور پر تفصیلی تبادلہ خیال کیا گیا۔

گورنر خیبر پختونخوا نے ایلیو ڈی روپو کو پاکستان میں موسمیاتی تبدیلیوں کے باعث حالیہ تباہ کن سیلاب اور ان سے ہونے والے بڑے پیمانے پر جانی و مالی نقصانات سے آگاہ کیا۔ انہوں نے کہا کہ موسمیاتی تبدیلی کے اثرات سے نمٹنے کے لیے عالمی برادری کو مشترکہ لائحہ عمل اختیار کرنا ہوگا، بصورت دیگر دنیا کو شدید غذائی قلت کا سامنا کرنا پڑ سکتا ہے۔

(جاری ہے)

اس موقع پر فیصل کریم کنڈی نے مقبوضہ جموں و کشمیر میں جاری انسانی حقوق کی سنگین خلاف ورزیوں پر بھی روشنی ڈالی اور کہا کہ مسئلہ کشمیر کے پائیدار حل کے بغیر خطے میں امن کا خواب شرمندۂ تعبیر نہیں ہوسکتا۔ ایلیو ڈی روپو نے پاکستان کے ساتھ یورپی یونین کے تعلقات کو خصوصی اہمیت دینے کا اعادہ کرتے ہوئے کہا کہ وہ موسمیاتی تبدیلی سے نمٹنے کے لیے پاکستان کی معاونت کی راہ ہموار کریں گے اور خیبر پختونخوا کے سیلاب متاثرہ علاقوں میں ہر ممکن امداد کو یقینی بنایا جائے گا۔

انہوں نے مزید کہا کہ بھارت کی جانب سے انڈس واٹر ٹریٹی کے یکطرفہ خاتمے کے معاملے کو بھی یورپی پارلیمنٹ میں زیر بحث لایا جائے گا۔ ملاقات میں چیئرمین کشمیر کونسل ای یو علی رضا سید، بیلجیئم کی کاروباری شخصیت سید حسن افتخار، بیلجیئم میں پاکستان کے ڈپٹی ہیڈ آف مشن سید فراز حسین زیدی اور اسد نواز بھی موجود تھے۔