Live Updates

واضح نظر آرہا منی بجٹ بھی آئے گا ،مہم جوئی بھی جاری رہے گی ‘ خادم حسین

برآمدی صنعتوں کو براہ راست ریلیف دینے کی ضرورت ہے ‘رکن بورڈ آف ڈائریکٹر پاکستان سٹون ڈویلپمنٹ کمپنی

جمعہ 13 جون 2025 11:24

لاہور(اُردو پوائنٹ اخبارتازہ ترین - این این آئی۔ 13 جون2025ء)فائونڈر گروپ کے سرگرم رکن ،پاکستان سٹون ڈویلپمنٹ کمپنی کے بورڈ آف ڈائریکٹر کے رکن ، سینئر نائب صدر فیروز پور روڈ بورڈاورسابق ممبر لاہور چیمبر آف کامرس خادم حسین نے کہا ہے کہ ماہرین معاشیات کے مطابق 4.2فیصد جی ڈی پی گروتھ کی پیشگوئی کافی حدتک غیر حقیقی لگتی ہے ،محصولات میں 14 فیصد سے زائد اضافے کا ہدف مقرر کیا گیاہے لیکن ایف بی آر کی استعداد کو دیکھا جائے تو یہ بھی آسان نہیں ہوگا ،بجٹ میں انڈسٹری سمیت جن شعبوں پر توجہ دینے کی ضرورت تھی انہیں نظر انداز کیا گیا ہے ۔

اپنے بیان میں انہوں نے کہا کہ ہمارے زر مبادلہ کے ذخائر کا زیادہ تر انحصار غیر ملکی قرضوں پر ہے جو لمحہ فکریہ ہونا چاہیے ،معیشت اپنے بل بوتے پر وہ گروتھ نہیں دکھا رہی جس سے یہ کہا جا سکے کہ ہم آنے والے سالوںمیں غیر ملکی قرضے اتارنے کے قابل ہو جائیں گے ۔

(جاری ہے)

گروتھ، روزگار اور ٹیکسز کا حصول صنعتوں کی ترقی سے جڑا ہوا ہے لیکن بجٹ میں اس پر اس طرح توجہ نہیں دی گئی جس کی ضرورت تھی۔

برآمدی صنعتوں کو براہ راست ریلیف دینے کی ضرورت ہے تاکہ عالمی منڈیوں میں مسابقت کی دوڑ میں شامل ہو کر ملک کے لئے زیادہ سے زیادہ زر مبادلہ لایا جا سکے ۔ خادم حسین نے کہا کہ حکومت کی معاشی ٹیم کے رویے سے واضح ہے کہ منی بجٹ بھی آئے گا اور مہم جوئی بھی جاری رہے گی جس کے معیشت پر منفی اثرات مرتب ہوں گے ۔