سموگ تدارک کیس، لاہورہائیکورٹ کا ہیٹ ویووز، کلائمیٹ چینج اور پانی کے ضیاع پراظہارتشویش

لاہور (اُردو پوائنٹ اخبارتازہ ترین - این این آئی۔ 13 جون2025ء) لاہور ہائیکورٹ نے ہیٹ ویوز ،کلائٹمٹ چینج اور پانی کے ضیاع پر تشویش کا اظہار کرتے ہوئے ریمارکس دیئے کہ لوگوں کو تواحساس ہی نہیں، پانی ضائع کررہے ہیں، انہیں اس کی قدر ہی نہیں، سندھ کے عوام سے پوچھیں پانی کی اہمیت کیا ہوتی ہے، محکمہ ماحولیات کو ہیوی ٹرانسپورٹ، بڑی گاڑیوں، رکشوں اور موٹر سائیکلوں کو فٹنس سٹیکرز ترجیحی بنیادوں پر جاری کرنے کی ہدایت جاری کر دی گئی ، عدالت نے ٹولنٹن مارکیٹ میں کتوں ،بلیوں سمیت دیگر جانوروں کی خریدوفروخت اور ٹولنٹن مارکیٹ میں گزشتہ دنوں کتوں کی ہونے والی اموات پر اظہار ناراضگی کیا ہے، عدالت عالیہ نے جانوروں کی خریدوفروخت کی دکانیں جلو پارک کے قریب بنانے کی بھی تجویز دیدی ۔

جسٹس شاہدکریم نے سموگ تدارک کے متعلق شہری ہارون فاروق سمیت دیگر درخواست گزاروں کی درخواستوں پر سماعت کی جس میں ڈپٹی اٹارنی جنرل اسدعلی باجوہ، اسسٹنٹ ایڈووکیٹ جنرل پنجاب ملک عمرطاہر،ڈپٹی ڈائریکٹرماحولیات علی اعجاز سمیتمتعدد محکموں کے نمائندے عدالت میں پیش ہوئے۔

(جاری ہے)

عدالت نے حکم دیا کہ انڈسٹریل یونٹس میں نصب واٹر ٹریٹمنٹ پلانٹس کی کارکردگی پر باقاعدہ سروے کیا جائے تاکہ آلودگی پر قابو پانے کے لیے عملی اقدامات کی نگرانی ہو سکے۔

سماعت کے دوران جوڈیشل واٹر کمیشن کے رکن نے عدالت کو آگاہ کیا کہ ایل ڈی اے نے عدالتی حکم کے باوجود ٹولنٹن مارکیٹ سے پرندوں کو منتقل نہیں کیا، جس پر عدالت نے برہمی کا اظہار کیا۔خاتون ممبر ماحولیاتی کمیشن نے ٹولٹن مارکیٹ کے متعلق رپورٹ پیش کی اوربتایا کہ عدالت نے ٹولٹن مارکیٹ میں کتے، بلیوں سمیت دیگر جانوروں کی خریداری پر پابندی عائد کررکھی ہے، عدالتی حکم کے باوجود جانوروں کی خریدوفروخت جاری ہے، سوشل میڈیا پر دیکھاکہ گرمی سے گزشتہ دنوں کچھ اوربلیاں بھی ہلاک ہوئیں۔

عدالت عالیہ نے جانوروں کی خریدوفروخت کی دکانیں جلو پارک کے قریب بنانے کی تجویر دیدی ۔ جسٹس شاہدکریم نے عوامی رویے پر افسوس کا اظہار کرتے ہوئے ریمارکس دیئے کہ لوگوں کو تواحساس ہی نہیں، پانی ضائع کررہے ہیں، انہیں اس کی قدر ہی نہیں، سندھ کے عوام سے پوچھیں پانی کی اہمیت کیا ہوتی ہے۔ہیٹ ویووز،کلائٹمٹ چینج سب چیزیں اکھٹی ہوچکی ہیں، ہیٹ ویو پرقابو پانے کیلئے تمام اداروں کوفوری اقدامات کی ضرورت ہے۔

پنجاب حکومت کے وکیل نے بتایا کہ حکومت نے پانی کے دو لاکھ میٹرز کی تنصیب کے لیے بجٹ میں رقم مختص کر دی ہے جس پر عدالت نے ہدایت کی کہ آئندہ سماعت پر پیش رفت رپورٹ کا باقاعدہ سرکاری لیٹر عدالت میں پیش کیا جائے۔جسٹس شاہدکریم نے کہا کہ لاہور میں گاڑیوں کا دھواں چیک کرنے کیلئے ایمیشن ٹیسٹنگ سسٹم جاری رہنا چاہیے ، واسا کے وکیل نے بتایا کہ دولاکھ دس ہزارواٹرمیٹر کی خریداری کی جارہی ہے، جسٹس شاہدکریم نے کہا کہ ان واٹر میٹرزکی تنصیب سے پانی کی خاطرخواہ بچت ہوسکتی ہے۔

عدالت نے دوران سماعت ٹریفک وارڈنز کو ہیلتھ الائونس نہ دیئے جانے پر بھی تحفظات کا اظہار کرتے ہوئے ریمارکس دیئے کہ محکمہ فنانس رکاوٹ بنا ہوا ہے، جنہیں الائونس ملنا چاہیے انہیں دیا نہیں جاتا۔ماحولیاتی تبدیلی پر تشویش ظاہر کرتے ہوئے عدالت نے ریمارکس دیئے کہ موسم شدید گرم ہو چکا ہے، درجہ حرارت دو ڈگری سینٹی گریڈ بڑھ چکا ہے، ہیٹ ویوز، کلائمیٹ چینج اور دیگر خطرات ایک ساتھ موجود ہیں، ہمیں سنجیدہ اقدامات کرنا ہوں گے۔بعد ازاں عدالت نے تمام متعلقہ محکموں کو عملدرآمد رپورٹس پیش کرنے کا حکم دیتے ہوئے سماعت 17جون تک ملتوی کر دی۔