ماسکو ٹرین سروس تاریخی اقدام ، روس،یورپ وافریقی ممالک کے ساتھ تجارت کی نئی راہیں کھلیں گی،شاہد عمران

جمعہ 13 جون 2025 18:25

لاہور (اُردو پوائنٹ اخبارتازہ ترین - اے پی پی۔ 13 جون2025ء) فیڈریشن آف پاکستان چیمبرز آف کامرس اینڈ انڈسٹری کی علاقائی کمیٹی برائے خوراک کے کنوینیئر شاہد عمران نے پاکستان سے ماسکو تک ٹرین سروس شروع کرنے کے فیصلے کا خیرمقدم کرتے ہوئے اسے ایک تاریخی اقدام قرار دیا ہے ،جس سے نہ صرف روس بلکہ وسطی ایشیائی ریاستوں ،یورپی اور افریقی ممالک کے ساتھ بھی تجارت کے فروغ کے لیے نئی راہیں کھلیں گی۔

(جاری ہے)

جمعہ کو یہاں سابق نائب صدر ایف پی سی سی آئی میاں زاہد اقبال کی قیادت میں صنعتکاروں کے ایک وفد سے گفتگو کرتے ہوئے انہوں نے کہا کہ اس ریل لنک سے نقل و حمل کے اخراجات اور ترسیل کے اوقات میں نمایاں کمی آئے گی اور پاکستانی اشیاء کو بین الاقوامی منڈیوں میں مزید مسابقتی بنانے میں مدد ملے گی۔ شاہد عمران نے کہا کہ یہ ٹرین سروس لاجسٹک کامیابی سے بڑھ کر تجارتی سفارتکاری میں ایک اسٹریٹجک پیشرفت ہے۔انہوں نے بہتر رابطوں کے ذریعے اقتصادی تعلقات کو فروغ دینے کے حکومتی ویژن کی تعریف کی اور تاجر برادری پر زور دیا کہ وہ اس ٹرین سروس کے ذریعے نئی مارکیٹیں اور برآمدات کے نئے مواقع تلاش کریں۔