محمد نواز شریف یونیورسٹی آف ایگریکلچر ملتان میں کیریئر ڈویلپمنٹ سینٹر اور پلیسمنٹ بیورو کے اشتراک سے ریکروٹمنٹ ڈرائیو کا انعقاد

جمعہ 13 جون 2025 22:00

ملتان (اُردو پوائنٹ اخبارتازہ ترین - اے پی پی۔ 13 جون2025ء) فوڈ سیکیورٹی اینڈ ایگریکلچر سینٹر آف ایکسیلنس (FACE) جو کہ فوجی فرٹیلائزر کمپنی (FFC) کا ایک اہم اقدام ہے نے محمد نواز شریف یونیورسٹی آف ایگریکلچر ملتان میں کیریئر ڈویلپمنٹ سینٹر اور پلیسمنٹ بیورو کے اشتراک سے ایک بھرپور ریکروٹمنٹ ڈرائیو کا انعقاد کیا۔ یہ ریکروٹمنٹ ڈرائیو پلانٹ پروٹیکشن کے فائنل ایئر طلبہ اور تازہ فارغ التحصیل نوجوانوں کے لیے تھی، جن کی تخصص حشرات الارض (Entomology) اور نباتاتی امراض (Plant Pathology) میں ہے۔

اس اقدام کا مقصد موزوں امیدواروں کو معاوضے کے ساتھ انٹرن شپ کے مواقع فراہم ہے۔ڈائریکٹوریٹ آف فیکلٹی سپورٹ پروگرامز کے زیرِ اہتمام منعقدہ اس آن لائن ٹیسٹ میں 65 سے زائد طلبہ و فارغ التحصیل نوجوانوں نے شرکت کی، جس کی نگرانی ڈاکٹر محمد اشتیاق، ڈاکٹر نادر نقاش، جناب عمر شریف اور شیزہ فاروق نے کی۔

(جاری ہے)

اس عمل کے شفاف انعقاد کو یقینی بنانے کے لیے FACE کی ٹیم آن لائن موجود رہی۔

ٹیسٹ کے بعد 37 امیدواروں کو انٹرویوز کے لیے شارٹ لسٹ کیا گیا۔ یہ انٹرویوز 13 جون 2025ء کو یونیورسٹی کیمپس میں منعقد ہوئے، جن میں FACE کی نمائندگی محمد احمد (پروگرام کوآرڈینیٹر)، عبدالشکور (منیجنگ ڈائریکٹر، FACE) اور محمد کاشف نذیر (سیکرٹری، FACE) نے کی۔ پینل نے امیدواروں کی علمی قابلیت، بین الشخصی رویے، مسئلہ حل کرنے کی صلاحیت اور جدید زرعی تکنیکوں سے آگاہی کا جائزہ لیا۔ اس عمل نے یہ واضح کیا کہ جامعات اور انڈسٹری کے درمیان شراکت داری کس قدر اہمیت رکھتی ہے۔