Live Updates

ٴپیپلز ٹرین سروس کا آغاز سریاب سے کچلاک تک عوامی نقل و حمل میں انقلاب لائے گا ، حاجی علی مدد جتک

جمعہ 13 جون 2025 20:40

۷کوئٹہ (اُردو پوائنٹ اخبارتازہ ترین - آن لائن۔ 13 جون2025ء) پاکستان پیپلز پارٹی کے سینئر رہنما اور رکن بلوچستان اسمبلی حاجی علی مدد جتک نے بلوچستان حکومت اور پاکستان ریلویز کے تاریخی اشتراک سے سریاب تا کچلاک پیپلز ٹرین سروس کے آغاز کے فیصلے کا پرجوش خیر مقدم کیا ہے۔حاجی علی مدد جتک نے اپنے بیان میں کہا کہ پیپلز ٹرین سروس کا آغاز سریاب سے کچلاک تک عوامی نقل و حمل میں انقلاب لائے گا۔

یہ منصوبہ نہ صرف مقامی شہریوں کے لیے سفر کو آسان بنائے گا بلکہ علاقے میں معاشی سرگرمیوں کو بھی فروغ دے گا۔

(جاری ہے)

انہوں نے مزید کہا کہ یہ منصوبہ ان کی تجویز پر شروع کیا گیا، جس پر وزیراعلی بلوچستان میر سرفراز بگٹی نے مثبت ردعمل دیتے ہوئے عوامی ترقی کے لیے ایک اور بڑی کامیابی کی بنیاد رکھی ۔وزیراعلی بلوچستان کا یہ اقدام عوام دوست ہے اور بلوچستان کے عوام کے لیے ایک قیمتی تحفہ ہے جو روزمرہ کی مشکلات کو کم کرے گا۔ میں اس فیصلے پر وزیراعلی بلوچستان کا دلی شکریہ ادا کرتا ہوں، حاجی علی مدد جتک نے کہا کہ پیپلز ٹرین سروس کے آغاز سے نہ صرف بلوچستان میں ٹرانسپورٹ کے شعبے میں بہتری آئے گی بلکہ اس سے عوامی سطح پر سہولیات میں اضافہ اور علاقائی ترقی کی راہیں بھی ہموار ہوں گی۔