ایران کے اسرائیل پر سینکڑوں میزائل حملے، کئی عمارتیں تباہ، جوہری تحقیق مرکز کو نشانہ بنانے کا دعویٰ

تل ابیب میں واقع اسرائیلی فوجی ہیڈکوارٹر کو بھی نشانہ بنایا گیا، یہ اسرائیلی فوج کا مرکزی فوجی اڈہ ہے جہاں اسرائیلی فوج کا اسٹریٹجک پلاننگ ڈویژن بھی ہے؛ اسرائیلی صحافی ایلون مزراہی کی تصدیق

ساجد علی ہفتہ 14 جون 2025 06:52

ایران کے اسرائیل پر سینکڑوں میزائل حملے، کئی عمارتیں تباہ، جوہری تحقیق ..

تہران/تل ابیب ( اُردو پوائنٹ اخبارتازہ ترین۔ 14 جون 2025ء ) ایران کی جانب سے جوابی کارروائی کے دوران اسرائیل پر سینکڑوں میزائل حملے کیے گئے جس میں کئی عمارتیں تباہ ہوگئیں، اسرائیلی جوہری تحقیق مرکز کو نشانہ بنانے کا بھی دعویٰ کردیا۔ تفصیلات کے مطابق ایران اور اسرائیل کے درمیان کشیدگی شدت اختیار کرچکی ہے، اس سلسلے میں ایران نے ہفتہ کی علی الصبح اسرائیل پر چوتھا بڑا میزائل حملہ کیا، حملے میں کئی میزائل داغے جن میں سے ایک نے تل ابیب کے وسطی علاقے میں اپنے ہدف کو کامیابی سے نشانہ بنایا، دھماکوں کی آوازیں تل ابیب اور یروشلم میں سنی گئیں۔

عالمی میڈیا رپورٹس میں بتایا گیا ہے کہ ایران کی جانب سے داغے جانے والے میزائل تل ابیب میں مختلف مقامات پر گرے جن میں ایک اسرائیلی وزارت دفاع کی عمارت بھی شامل ہے، اس کے علاوہ گش دان میں بھی دو ایرانی میزائل گرے، حملے کے نتیجے میں شدید آگ بھڑک اٹھی، ان حملوں میں کم از کم 63 افراد زخمی ہوئے اور کئی عمارتیں تباہ ہوگئیں، ایران کی جانب سے فائر کیے گئے کئی میزائلوں کو فضاء میں ہی تباہ کر دیا گیا، دیگر نے ہدف کو نشانہ بنایا، میزائل حملوں کے پیش نظر اسرائیلی فوج نے شہریوں کو محفوظ مقامات پر منتقل ہونے کی ہدایات جاری کر دیں۔

(جاری ہے)

بتایا جارہا ہے کہ ایران نے ایک گھنٹے میں تین وقفوں کے ساتھ مجموعی طور پر 150 سے 200 میزائل اسرائیل پر داغے گئے، پہلے حملے میں 100، دوسرے میں 50 اور تیسرے حملے میں بھی تقریباً 50 میزائل فائر کیے گئے، اسرائیلی صحافی ایلون مزراہی نے تصدیق کرتے ہوئے بتایا کہ ایرانی حملے میں تل ابیب میں واقع اسرائیلی فوجی ہیڈکوارٹر کو بھی نشانہ بنایا گیا، یہ فوجی مرکز ہاکیریا کے نام سے جانا جاتا ہے جو اسرائیلی فوج کا مرکزی فوجی اڈہ ہے جہاں اسرائیلی فوج کا اسٹریٹجک پلاننگ ڈویژن بھی ہے۔