پنجاب کا تعلیمی بجٹ دیگر صوبوں کے مقابلے میں تاریخ ساز بجٹ ہوگا،صوبائی وزیر رانا سکندر حیات

اتوار 15 جون 2025 20:00

لاہور (اُردو پوائنٹ اخبارتازہ ترین - اے پی پی۔ 15 جون2025ء) وزیر تعلیم پنجاب رانا سکندر حیات نے کہا ہے کہ پنجاب کا تعلیمی بجٹ دیگر صوبوں کے مقابلے میں تاریخ ساز بجٹ ہوگا، دوسرے صوبوں کے تعلیمی بجٹ کا موازنہ پنجاب کے تعلیمی بجٹ سے بخوبی کیا جا سکے گا۔اپنے ایک بیان میں انہوں نے کہا کہ دیگر صوبوں کا بجٹ تعلیم کے نام پر محض خانہ پری ہے، پنجاب کا تعلیمی بجٹ نہ صرف مثالی ہوگا بلکہ نسلوں کے مستقبل کیلئے سرمایہ کاری کرنے کے اعتبار سے وزیراعلی مریم نواز کی ترجیحات کو بھی واضح کرے گا۔

وزیر تعلیم نے کہا کہ پنجاب کا تعلیمی بجٹ دیگر صوبوں کے مقابلے میں 200 سے 300 گنا زیادہ ہوگا، یہ اضافہ تعلیمی ترقی کی ایسی بنیاد رکھے گا جس پر روشن مستقبل کی عمارت کھڑی ہوگی۔ انہوں نے مزید کہا کہ پنجاب کا تعلیمی بجٹ اعداد و شمار کا مجموعہ نہیں بلکہ عمل کی تصویر ہوگا۔

(جاری ہے)

انہوں نے کہا کہ بڑی بڑی باتیں سب کرتے ہیں لیکن بڑے اور عملی کام صرف وزیر اعلی مریم نوازہی کرتی ہیں، تعلیمی بجٹ کے حوالے سے اپنے ایک ویڈیو پیغام میں رانا سکندر حیات نے کہا کہ نیا مالی سال تعلیمی شعبہ کی ترقی و استحکام کا ضامن ثابت ہوگا، نئے مالی سال میں سکول میل پروگرام، ارلی ایئر ایجوکیشن، لیپ ٹاپ و سکالرشپ سکیم کا دائرہ وسیع کرنے کے ساتھ ساتھ آئی ٹی لیب، سٹیم لیبز، اساتذہ کیلئے سکوٹیز سمیت بہت سے نئے تعلیمی منصوبوں کی طویل لسٹ ہے جو تعلیمی انقلاب کا پیش خیمہ ہوگی۔