ایڈیشنل سیکرٹری بی آئی ایس پی ڈاکٹر طاہر نور کا جنوبی پنجاب کا دورہ، مستحقین میں رقوم کی تقسیم کیلئے ریٹیل پیمنٹ ماڈل کی تیاریوں کا جائزہ

اتوار 15 جون 2025 21:00

خانیوال (اُردو پوائنٹ اخبارتازہ ترین - اے پی پی۔ 15 جون2025ء) ایڈیشنل سیکرٹری بی آئی ایس پی ڈاکٹر طاہر نور نے آج بینظیر انکم سپورٹ پروگرام (بی آئی ایس پی ) کی چوتھی سہ ماہی قسط کی ریٹیل پیمنٹ ماڈل کے تحت تقسیم کے لیے جاری تیاریوں کے سلسلے میں ضلع خانیوال کا دورہ کیا۔ یہ قسط ملک بھر میں پیر، 16 جون سے جاری کی جائے گی-اس دورے کا مقصد فیلڈ سطح پر تیاریوں کا جائزہ لینا، ضلعی ٹیموں اور شراکت دار بینکوں کے نمائندوں سے ملاقات کرنا، اور اس بات کو یقینی بنانا تھا کہ ادائیگی کے تمام انتظامات مکمل طور پر فعال ہوں۔

ڈاکٹر طاہر نور نے زور دیا کہ شدید گرمی کی لہر کے پیشِ نظر ریٹیل ماڈل مستحقین کو باوقار، محفوظ اور آسان ادائیگی کی سہولیات فراہم کرنے کے لیے متعارف کروایا جا رہا ہے۔

(جاری ہے)

اس ماڈل کے تحت، مستحق افراد کو اپنی ادائیگیاں بائیومیٹرک تصدیق کے بعد نامزد ریٹیل دکانوں کے ذریعے فراہم کی جائیں گی۔دورے کے دوران ایڈیشنل سیکرٹری نے علاقائی و ضلعی حکام کے ساتھ اجلاس منعقد کیے اور شراکت دار بینکوں کو ہدایت دی کہ ریٹیل پوائنٹس کی مکمل فعالیت ، بشمول تربیت یافتہ عملے کی دستیابی، بائیومیٹرک ڈیوائسز، انٹرنیٹ کنیکٹیویٹی، اور موثر آگاہی مواد کی فراہمی کو یقینی بنایا جائے - بی آئی ایس پی کی فیلڈ ٹیموں کو ہدایت کی گئی کہ وہ بروقت اور واضح آگاہی مہم کا آغاز کریں تاکہ مستحقین کو ادائیگی کے نئے طریقہ کار کے بارے میں مکمل معلومات فراہم کی جا سکیں۔

ڈاکٹر طاہر نور نے اپنے جنوبی پنجاب کے دورے کے دوران اس ہفتے کے اوائل میں ملتان اور بہاولپور کا بھی دورہ کیا، جہاں انہوں نے ادائیگیوں کی تیاریوں کا معائنہ کیا اور فیلڈ ٹیموں اور بینکوں کے نمائندوں کے ساتھ ملاقاتیں کیں۔انہوں نے اس بات پر زور دیا کہ تمام اسٹیک ہولڈرز بشمول بی آئی ایس پی عملہ، مالیاتی ادارے، مقامی انتظامیہ، اور سب سے بڑھ کر مستفید ہونے والے افراد کے درمیان مضبوط رابطہ اور ہم آہنگی ناگزیر ہے۔

انہوں نے واضح کیا کہ بی آئی ایس پی اور اس کے پارٹنرز کا مشترکہ مقصد یہ ہے کہ مستحقین کو ان کی مکمل نقد امداد باعزت، محفوظ اور آسان طریقے سے فراہم کی جائے۔ریٹیل ماڈل کے تحت ادائیگیاں پیر، 16 جون 2025 سے باضابطہ طور پر شروع ہوں گی۔ مستحقین سے گزارش ہے کہ وہ اپنے اصل شناختی کارڈ کے ہمراہ مقررہ ریٹیل پوائنٹس پر جائیں، ادائیگی کی مکمل رقم رسید کے ساتھ وصول کریں، اور کسی بھی شکایت کی صورت میں متعلقہ تحصیل دفتر یا بی آئی ایس پی ہیلپ لائن 080026477 پر رابطہ کریں۔\378