مرکزی علماکونسل پاکستان کے زیر اہتمام شہادت حضرت سیدنا عثمان غنی ؓ سیمینار کا انعقاد

فیصل آباد (اُردو پوائنٹ اخبارتازہ ترین - اے پی پی۔ 16 جون2025ء) چیئرمین مرکزی علما کونسل پاکستان صاحبزادہ زاہد محمود قاسمی کی زیر صدارت مرکزی علما کونسل پاکستان کے زیر اہتمام شہادت حضرت سیدنا عثمان غنی ؓ سیمینارختم نبوت اسلامک ریسرچ سنٹر فیصل آباد میں منعقد ہوا۔ محمد عبداللہ ترجمان میڈیا سیل مرکزی علما کونسل پاکستان کے مطابق سیمینار سے خطاب کرتے ہوئے صاحبزادہ زاہد محمود قاسمی نے کہا کہ سیدنا عثمان غنی ؓ کی سیرت و کردار نسل نو کیلئے مشعل راہ ہے۔

آپ ؓ نے اپنے دور حکومت میں فوجیوں کے وظائف میں اضافہ کیا۔ فوجی مراکز مضبوط کئے۔ملک کی نظم و نسق کو مضبوط اور مستحکم بنیادوں پر استوار کیا۔ آپ ؓ کی سیرت سے یہ سبق ملتا ہے کہ اللہ اور اس کے رسولﷺ کی خاطر راہ حق میں پیش آمدہ تکالیف کو خندہ پیشانی سے برداشت کرنا اور اُمت کو انتشار سے بچانا صحابہ کرام ؓ کی سنت ہے۔

(جاری ہے)

اس موقع پروائس چیئرمین پیر جی خالد محمود قاسمی نے کہا کہ سیدنا عثمان غنی ؓ نے اپنی ساری زندگی دین اسلام اور آقاﷺ کی خدمت کیلئے وقف کی۔

آپ ؓ کی شخصیت آج کے نوجوانوں کیلئے رول ماڈل ہے۔ حضرت عثمان غنی ؓ نے اپنے سیاسی شعور اور حکمت عملی سے اسلام کو تقویت بخشی۔مرکزی ڈپٹی سیکرٹری جنرل مولانا شبیر احمد عثمانی نے کہا کہ سیدنا عثمان غنی ؓ کی سیرت اور فکر سے اُمت مسلمہ کو انتہاء پسندی سے بچایا جاسکتا ہے۔مشکل ترین حالات میں بھی مدینہ طیبہ میں خون ریزی برداشت نہیں کی بلکہ صبر کی انتہا کرتے ہوئے پوری دنیا کے امن پسندوں کیلئے مشعل راہ بن گئے۔

حضرت سیدنا عثمان غنی ؓ کا دور خلافت بے مثال تھا۔سیمینار سے خطاب کرتے ہوئے مولانا یوسف فاروقی نے کہا کہ حضرت سیدنا عثمان غنی ؓ کی زندگی کا ہر پہلو نہ صرف مسلمانوں کیلئے بلکہ عالم انسانیت کیلئے مشعل راہ ہے۔ آپ ؓ عشرہ مبشرہ میں سے ایک ہیں۔ آپ ؓ کا شمار نبی اکرم ﷺ کے خلفاء میں ہوتا ہے۔مولانا اعظم فاروق نے کہا کہ اُمت مسلمہ میں کامل الحیاء والایمان کے الفاظ آپؓ ہی کی شان میں استعمال کئے گئے۔

نبی پاک ﷺ کی دو صاحبزادیوں کا نکاح حضرت سیدنا عثمان غنی ؓ سے ہوا،جس کی وجہ سے آپ ؓ کا لقب ذوالنورین یعنی دو نوروں والا ہو گیا۔اس موقع پر مولانا عابد فاروقی نے کہا کہ اللہ کے نبی ﷺ نے فرمایا کہ ہر نبی کا ایک رفیق ہوتا ہے اور جنت میں میرے رفیق عثمانؓ ہوں گے۔ اسلام کیلئے مالی اور جانی قربانی آپؓ نے پیش کی۔آپ ؓ کا دور خلافت اسلامی دنیا کے حکمرانوں کیلئے مشعل راہ ہے۔سیمینار میں مولانا رب نواز، مولانا کرم داد حذیفی،مولانا الطاف اللہ فاروقی، قاری ثاقب عزیز، قاری سعید مدنی، صاحبزادہ حسین احمد قاسمی و دیگر علماء نے خطاب کیا۔