ض* پنجاب کا حالیہ بجٹ ایک متوازن اور عوام دوست بجٹ ہے ‘ بیرسٹر دانیال چوہدری

؂اسلام آباد(اُردو پوائنٹ اخبارتازہ ترین - آن لائن۔ 17 جون2025ء) وفاقی پارلیمانی سیکرٹری برائے اطلاعات و نشریات بیرسٹر دانیال چوہدری نے کہا ہے کہ پنجاب کا حالیہ بجٹ ایک متوازن اور عوام دوست بجٹ ہے جو وزیر اعلی پنجاب مریم نواز کی مدبرانہ قیادت اور عوامی فلاح کے ویژن کا عملی مظہر ہے۔ ایک انٹرویو میں انہوں نے کہا کہ اس بجٹ میں معاشرے کے تمام طبقات کو ریلیف فراہم کرنے کے ساتھ ساتھ صوبے کی مجموعی ترقی کو بھی یقینی بنایا گیا ہے۔

انہوں نے کہا کہ بجٹ میں تعلیم اور صحت کے شعبے کو خاص اہمیت دی گئی ہے۔ حکومت نے تعلیمی وظائف میں خاطر خواہ اضافہ کرتے ہوئے 4.5 ارب روپے مختص کیے ہیں جبکہ ہونہار طلبہ کے لیے 15 ارب روپے کے ''اسکالرشپ پروگرام'' کا اعلان کیا گیا ہے۔ مزید برآں 112,000 لیپ ٹاپس طلبہ میں تقسیم کیے جائیں گے تاکہ جدید تعلیم تک رسائی میں آسانی ہو۔

(جاری ہے)

انہوں نے کہا کہ پنجاب بھر کے سرکاری اسکولز اور کالجز کو سولر انرجی پر منتقل کیا جائے گا جو نہ صرف توانائی بحران کے خاتمے میں معاون ہو گا بلکہ ماحولیاتی تحفظ کا باعث بھی بنے گا۔

انہوں نے کہا کہ صحت کے شعبے کے لیے بجٹ میں 41 فیصد اضافہ کیا گیا ہے جو وزیر اعلی پنجاب مریم نواز کی صحت عامہ کے حوالے سے سنجیدہ ترجیحات کا عکاس ہے۔ تحصیل اسپتالوں کو سولر انرجی پر منتقل کرنے کا جامع پروگرام شروع کیا جا رہا ہے تاکہ توانائی کے مسائل کا حل فراہم کرتے ہوئے طبی سہولیات کی فراہمی میں بہتری لائی جا سکے۔ اس کے ساتھ ہی عوام کو مفت ادویات کی فراہمی کے لیے خطیر رقم مختص کی گئی ہے جو خاص طور پر غریب اور نادار مریضوں کے لیے ایک بڑا ریلیف ثابت ہو گی۔

انہوں نے کہا کہ وزیر اعلی پنجاب آسان کاروبار پروگرام کے لیے 89 ارب روپے مختص کیے گئے ہیں جس کا مقصد صوبے میں چھوٹے اور درمیانے درجے کے کاروبار کو فروغ دینا اور نوجوانوں کو خود روزگاری کے مواقع فراہم کرنا ہے۔ اس سے نہ صرف بے روزگاری میں کمی آئے گی بلکہ معاشی سرگرمیوں میں بھی نمایاں اضافہ متوقع ہے۔ انہوں نے کہا کہ زراعت کے شعبے کے لیے بجٹ میں 24 فیصد اضافہ کیا گیا ہے جو کسانوں کی فلاح و بہبود اور زرعی پیداوار میں اضافے کے حکومتی عزم کا واضح ثبوت ہے۔

زرعی پیداوار کے فروغ کے لیے گرین ٹریکٹر اسکیم کا آغاز کیا گیا ہے تاکہ کاشتکاری کے عمل کو جدید خطوط پر استوار کیا جا سکے۔ انہوں نے کہا کہ ٹرانسپورٹ کے بجٹ میں ریکارڈ 359 فیصد اضافہ کیا گیا ہے جس کا مقصد عوام کو بہتر اور سستی سفری سہولیات مہیا کرنا ہے۔ انہوں نے کہا کہ پولیس کے بجٹ میں بھی 132 فیصد اضافہ کیا گیا ہے تاکہ قانون نافذ کرنے والے اداروں کو جدید خطوط پر استوار کیا جا سکے۔

اس اضافے کا مقصد پولیس فورس کو جدید ٹیکنالوجی، تربیت اور ضروری وسائل سے لیس کرنا ہے تاکہ عوام کو بہتر سیکیورٹی فراہم کی جا سکے۔ انہوں نے کہا کہ ماحولیات کے تحفظ کے لیے بجٹ میں 50 فیصد اضافہ کیا گیا ہے جبکہ بلدیاتی اداروں کے بجٹ میں 130 فیصد اضافہ کر کے مقامی حکومتوں کو بااختیار بنانے کی کوشش کی گئی ہے۔ انہوں نے کہا کہ پنجاب بھر میں صاف پانی کی فراہمی کو یقینی بنانے کے لیے متعدد اقدامات کیے جا رہے ہیں۔ بیرسٹر دانیال چوہدری نے اس بجٹ کو معاشی استحکام، روزگار کے مواقع اور عوامی فلاح کا ایک سنگ میل قرار دیا ہے۔ انہوں نے امید ظاہر کی کہ یہ بجٹ نہ صرف عوام کی توقعات پر پورا اترے گا بلکہ ملک کو ترقی کی نئی راہوں پر گامزن کرے گا۔۔۔۔۔اعجاز خان