اسرائیل اور ایران کے درمیان کشیدگی، متعدد ممالک کا شہریوں کے انخلا کا اعلان

منگل 17 جون 2025 16:49

ابوظہبی (اُردو پوائنٹ اخبارتازہ ترین - اے پی پی۔ 17 جون2025ء) اسرائیل اور ایران کے درمیان کشیدگی کے باعث متعدد ممالک نے اپنے شہریوں کے انخلا کا اعلان کیا ہے ۔امارات نیوز ایجنسی وام کے مطابق اسرائیل اور ایران کےدرمیان جاری کشیدگی اور میزائل حملوں کے نتیجے میں بڑھتے ہوئے جانی نقصانات کے پیشِ نظر کئی ممالک نے اپنے شہریوں کے انخلا کے منصوبوں کا اعلان کیا ہے۔

اس تناظر میں پولینڈ کی وزارت خارجہ کی انڈر سیکرٹری آف سٹیٹ ہینریکا موشِتسکا-ڈینڈیس نے اسرائیل میں مقیم پولش شہریوں کے انخلا کے لیے منصوبے کا آغاز کرنے کا اعلان کیا ہے۔سلوواکیہ نے بھی اردن اور قبرص کے ذریعے اسرائیل سے اپنے شہریوں اور دیگر یورپی یونین ممالک کے باشندوں کو نکالنے کے لیے فضائی آپریشن شروع کر دیا ہے۔

(جاری ہے)

براتسلاوا کی وزارت خارجہ و یورپی امور نے گزشتہ روز بتایا کہ پہلے پرواز کے ذریعے 73 افراد کو دارالحکومت منتقل کیا گیا، جن میں 30 سلوواک شہری اور 43 دیگر یورپی ممالک کے شہری شامل تھے۔

مزید انخلا کی پروازیں آج اور کل متوقع ہیں۔روسی حکام کے مطابق ایران میں مقیم 86 شہریوں کو ہفتے کو آذربائیجان منتقل کیا گیا جبکہ اتوار کو مزید 238 افراد، جن میں سفارتکاروں کے اہلِ خانہ بھی شامل تھے، انخلا کے عمل میں شامل کیے گئے۔چین نے اسرائیل میں موجود اپنے شہریوں کو فوری طور پر ملک چھوڑنے کا مشورہ دیا ہے۔ تل ابیب میں قائم چینی سفارتخانے نے منگل کو ایک اعلامیہ میں چینی باشندوں کو زمینی سرحدوں کے ذریعے، خصوصاً اردن کے راستے اسرائیل سے نکلنے کی ہدایت جاری کی ہے۔اسی طرح جنوبی کوریا کی وزارت خارجہ نے بھی اپنے شہریوں پر زور دیا ہے کہ وہ ایران فوری طور پر چھوڑ دیں۔