پولیس عوام کی اُمیدوں پر پورا اترتے ہوئے پر امن عاشورہ محرم کو ہر قیمت پر یقینی بنائے گی، آئی جی خیبر پختونخوا

منگل 17 جون 2025 19:40

پشاور (اُردو پوائنٹ اخبارتازہ ترین - اے پی پی۔ 17 جون2025ء) انسپکٹر جنرل آف پولیس خیبر پختونخوا ذوالفقار حمید کی زیر صدارت محرم الحرام کے حوالے سے سینٹرل پولیس آفس پشاور میں ویڈیو لنک کانفرنس کا انعقاد کیا گیا جس میں ایڈیشنل آئی جی پی آپریشنز محمد علی بابا خیل، ایڈیشنل آئی جی پی سپیشل برانچ محمد علی گنڈا پور، چیف کیپٹل سٹی پولیس پشاور قاسم علی خان، ڈی آئی جی فنانس سید فدا حسن شاہ، ڈی آئی جی آپریشنز ربنواز خان اور اے آئی جی آپریشن محمد وقاص خان نے شرکت کی جبکہ تمام ریجنل پولیس آفیسرز اور ضلعی پولیس افسران ویڈیو لنک کے ذریعے اپنے اپنے ریجنز اور اضلاع سے کانفرنس میں شریک ہوئے۔

کانفرنس میں صوبے میں امن و امان کی مجموعی صورتحال کے ساتھ ساتھ بالخصوص آنے والے محرم الحرام کے حوالے سے سکیورٹی اقدامات کا جائزہ لیا گیا۔

(جاری ہے)

پولیس سربراہ کو صوبے میں محرم الحرام کے حوالے سے مجالس، جلوسوں اور سکیورٹی انتظامات کے بارے میں ریجنل پولیس افسران نے تفصیلی بریفنگ دی۔ اس موقع پر خطاب کرتے ہوئے آئی جی پی ذوالفقارحمید نے کہا کہ خطے کی موجودہ صورتحال کے پیش نظر پُر امن محرم کا انعقاد ایک بہت بڑا چیلنج بن گیا ہے۔

سماج دشمن عناصر ملک کی جڑیں کھوکھلے کرنے کا کوئی موقع ہاتھ سے جانے نہیں دیتے۔ آئی جی پی نے کہا کہ خیبر پختونخوا پولیس نے ہر مشکل حالات میں توقعات سے بڑھ کر اپنے مقدس فرائض سرانجام دیتے ہوئے شرپسندوں کے عزائم کو بروقت خاک میں ملایا ہے۔ انہوں نے کہا کہ عوام کے جان ومال کا تحفظ پولیس کی اولین ذمہ داری ہے اور پولیس اس بار بھی عوام کی اُمیدوں پر پورا اترتے ہوئے پر امن عاشورہ محرم کو ہر قیمت پر یقینی بنائے گی۔

انہوں نے اجلاس کے شرکاءکو ہدایت کی کہ وہ فرقہ وارانہ ہم آہنگی اور مذہبی بھائی چارے کے قیام اور شرپسند وں پر کڑی نگاہ رکھنے کے لئے ٹھوس اور موثر اقدامات کے ذریعے فول پروف سکیورٹی کو یقینی بنائیں۔ اعلیٰ پولیس حکام کو مزید ہدایت کی گئی کہ وہ پولیس اہلکاروں کو ڈیوٹی پر بھیجوانے سے پہلے ان کی باقاعدہ بریفنگ کریں اور ان کے تحفظ کو ہر حوالے سے یقینی بنانے کے لیے حفاظتی جیکٹس اور ضروری اسلحہ و ہتھیاروں سے لیس کرکے بھیجوائیں۔