پنجاب کی مینڈیٹ چورسرکار کی ترجمان بدزبان ہی نہیں بد دماغ بھی حد سے بڑھ کر ہے، ترجمان پی ٹی آئی

بدھ 18 جون 2025 22:44

اسلام آباد(اُردو پوائنٹ اخبارتازہ ترین - آن لائن۔ 18 جون2025ء)ترجمان تحریک انصاف نے الزام لگایا ہے کہ پنجاب کی مینڈیٹ چور سرکار کی ترجمان بدزبان ہی نہیں بددماغ بھی حد سے بڑھ کر ہے،ریاستی اداروں اور شخصیات کو سیاست میں گھسیٹ کر متنازعہ بیان بازی کا ایندھن بنانا شرمناک ہے۔

(جاری ہے)

عظمی بخاری کے بیان پر ردعمل کا اظہار کرتے ہوئے، ترجمان تحریک انصاف نے کہاکہ میڈیا پر بازاری زبان میں صدا گیری سے مجرموں کا یہ گروہ خود کو عوام کی نگاہ میں معتبر بنا سکتا ہے نہ اپنی مردہ سیاست میں کسی درجے کی جان ڈال سکتا ہے،پاکستان میں تباہی اور بربادی کی سیاہ تاریخ رقم کرنے والا ٹولہ بیہودہ بیان بازی سے خود کو ملک و قوم کا خیر خواہ ثابت کرنے میں پہلے کامیاب ہوا نہ اب ہوگا،اڈیالہ میں قید قوم کے حقیقی قائد کی نگاہ پاکستان اور پیچیدگی اختیار کرتے حالات پر، ان سیاسی مسخروں کی پوری توجہ جوتے چمکانے پر مرکوز ہے، ترجمان تحریک انصاف نے کہا کہ چوری کی حکومت ملنے کے باوجود نکمّا، نااہل اور شرم و حیا سے محروم یہ گروہ ٹخنوں سے اوپر دیکھنے اور ذلت آمیز خوشامد کے علاوہ اپنی نوکری بچانے کا کوئی رستہ تلاش کرنے میں ناکام ہے، پنجاب میں کسان کی محنت برباد، عوام در بدر ہیں تاہم ننگِ ناموس درباریوں کے اس گروہ کی ترجیحات ہیجان، انتشار اور تقسیم کے سوا کچھ نہیں،عوام اور ریاستی اداروں میں فاصلوں کی خلیج بڑھا کر اپنی روزی روٹی کا بندوبست کرنے والے ان گھٹیا کرداروں کا کھیل زیادہ عرصے تک نہیں چل پائے گا، پاکستان کو طاقت کے زور پر آئین کی بالادستی، قانون کی حکمرانی اور جمہوریت کے احترام و تسلسل کی راہ سے ہٹا کر درباری ایجنڈے کی بھینٹ چڑھانے والے جلد کٹہرے میں کھڑے کئے جائیں گے۔