پنجاب کی وارث پیپلز پارٹی ہے اور رہے گی،پیپلز پارٹی نے شہادتوں سے آئین تک پاکستان کو دیا،ندیم افضل چن

منگل 17 جون 2025 23:10

لاہور (اُردو پوائنٹ اخبارتازہ ترین - اے پی پی۔ 17 جون2025ء) پاکستان پیپلزپارٹی کے مرکزی سیکرٹری اطلاعات ندیم افضل چن نے کہا ہے کہ پنجاب کی وارث پیپلز پارٹی ہے اور رہے گی،پیپلز پارٹی نے شہادتوں سے آئین تک پاکستان کو دیا،پیپلز پارٹی میں کام کرنیوالے بہت لوگ ہیں صرف انہیں انگیج کرنے کی ضرورت ہے۔وہ پیپلز سیکرٹریٹ ماڈل ٹاون میں وسطی پنجاب کے انفارمیشن سیکرٹریز کے اجلاس سے خطاب کر رھے تھے جس میں سیکرٹری اطلاعات شہزاد سعید چیمہ ،عائشہ نوازچودھری،بیرسٹر عامر حسن،ڈاکٹرضراریوسف،نایاب جان،ڈیجیٹل ایکسپرٹ علی ایوب ،سیف,بشری منظور مانیکا،ڈویژنل،ڈسٹرکٹ،تحصیل اور سٹی انفارمیشن سیکرٹریز نے شرکت کی۔

ندیم افضل چن نے کہا کہ انفارمیشن ونگ کو تحصیل لیول تک مضبوط بنائیں گے اورانفارمیشن بیورو کا اپنا سافٹ ویئر بنائیں گے جس میں تمام لوگوں کا ڈیٹا محفوظ ہو گا۔

(جاری ہے)

انہوں نے واضح کیا کہ سیاست ایک ایسا پیشہ ہے جسکی کوئی فیس نہیں،پہلا کام ورکر اور قیادت کے درمیان رابطے بحال کرنا ہے،کوئی بھی اکیلا کام نہیں کر سکتا،ٹیم بنانا پڑتی ہے۔انہوں نے پی پی وسطی پنجاب کے تمام ونگز کو 30جون تک انفارمیشن بیورو کی سفارشات دینے کی ہدایت کرتے ہوئے کہا کہ ٹک ٹاک،فیس بک اور ایکس پر بیٹھا ورکر اب زیادہ اثر انداز ہو سکتا ہے۔

انہوں نے کہا کہ روٹی کپڑا اور مکان آج بھی سچائی ہے، پارٹی اور سوسائٹی میں نئے خون کو شامل کریں۔انہوں نے بتایا کہ انفارمیشن کا کنونشن کرانے سے قبل پنجاب میں کم از کم 500انفارمیشن کی حد پار کرنا چاہتے ہیں۔