اسرائیلی حملے تک ایران ایٹم بم نہیں بنا رہا تھا، سربراہ آئی اے ای اے

جمعہ 20 جون 2025 12:50

بیونس آئرس (اُردو پوائنٹ اخبارتازہ ترین - اے پی پی۔ 20 جون2025ء) بین الاقوامی جوہری توانائی ایجنسی ( آئی اےای اے) نے کہا ہے کہ 13 جون کو جب اسرائیل نے ایران کے خلاف فوجی کارروائی کا آغاز کیا تو اس وقت تک ایران ایٹم بم نہیں بنا رہا تھا۔ روسی خبر رساں ادارے تاس کے مطابق آئی اےای اے ڈائریکٹر جنرل رافیل گروسی نے ارجنٹائن کے اخبار "لا ناسیون" کو انٹرویو میں کہا کہ جب اسرائیل نے ایران پر حملہ کیا، اُس وقت ایران ایٹمی ہتھیار نہیں بنا رہا تھا۔

اسرائیلی حملے کے وقت ایران کے جوہری ہتھیار حاصل کرنے کے حوالہ سے ایک سوال کے جواب میں انہوں نے کہا کہ اس وقت اس کا جواب نفی میں ہے، لیکن اس کی طرف پیشرفت کے حوالے سے کئی عناصر موجود تھے۔دریں اثنا ایران نے آئی اے ای اے پر الزام لگایا ہے کہ وہ ایران کے جوہری پروگرام کے بارے میں حقیقت کو چھپا رہا ہے ۔

(جاری ہے)

یہ الزام آئی اے ای اے کے ڈائریکٹر جنرل رافیل گروسی کے اس بیان کے بعد سامنے آیا ہے کہ آئی اے ای اے کے پاس ایران کی طرف سے جوہری ہتھیار بنانے کی منظم کوشش کا کوئی ثبوت نہیں ہے۔

ترک خبر رساں ادارے کی رپورٹ کے مطابق ایرانی وزارت خارجہ کے ترجمان اسماعیل بقائی نے اپنے آفیشل ایکس اکاؤنٹ پر رافیل گروسی کو مخاطب کرتے ہوئے کہا کہ اب بہت دیر ہو چکی ہے ،آپ نے اپنی متعصبانہ رپورٹ میں اس سچائی کو چھپا دیا جسے تین یورپی ممالک جرمنی، فرانس اور برطانیہ اور امریکا نے ایران کی طرف سے آئی اے ای اے کی عدم تعمیل کے بے بنیاد الزام مبنی قرارداد کے مسودہ کی بنیاد بنایا ہے۔

ایرانی ترجمان نے کہا کہ اسرائیل نے اسی قرارداد کو ایران کے خلاف جارحیت اور ہماری پرامن جوہری تنصیبات پر غیر قانونی حملہ کرنے کے لئے استعمال کیا۔ایرانی ترجمان نے کہا کہ رافیل گروسی نے آئی اے ای اے کو جوہری ہتھیاروں کے عدم پھیلائو کے معاہدے سے باہر ممالک کے لئے بڑی طاقتوں کا آلہ کار بنا دیا ہے۔ واضح رہے کہ آئی اے ای اے نے گزشتہ ہفتے، 20 سال میں پہلی بار ایران کو اپنی جوہری ذمہ داریوں کی خلاف ورزی کرنے کا مرتکب قرار دیاتھا۔\932