آئی ایم ایف کی 5 سال پرانی گاڑیاں درآمد کرنے کی اجازت

اسلام آباد(اردوپوائنٹ اخبار تازہ ترین۔20جون 2025)عالمی مالیاتی فنڈ(آئی ایم ایف)نے وزارت تجارت کو 5 سال پرانی گاڑی درآمد کرنے کی اجازت دیدی،ستمبر 2025 سے 5 سال پرانی گاڑیوں کی کمرشل امپورٹ کھولی جا رہی ہے۔ سینیٹ کمیٹی برائے خزانہ کا اجلاس سینیٹر سلیم مانڈوی والا کی زیر صدارت ہوا جس میں وزیر خزانہ محمد اورنگزیب بتایا کہ امپورٹڈ 5 سال پرانی گاڑی پر 40 فیصد ڈیوٹی عائد ہوگی اور صرف 700 دن باہر رہنے والے بیگیج سکیم میں گاڑی لانے کی اجازت ہوگی۔

اجلاس میں وزیر خزانہ نے یہ خوشخبری بھی سنائی کہ یکم جولائی 2026 سے 5 سال سے زائد پرانی گاڑی بھی منگوانے کی اجازت ہوگی اور پرانی امپورٹڈ گاڑیوں پر ڈیوٹی کم ہو کر 30 فیصد ہو جائے گی۔انہوں نے کہا کہ یکم جولائی 2027 سے پرانی امپورٹڈ گاڑیوں پر ڈیوٹی 20 فیصد اور یکم جولائی 2028 سے ڈیوٹی 10 فیصد ہو جائے گی۔

(جاری ہے)

جب کہ یکم جولائی 2029 سے پرانی امپورٹڈ گاڑیوں پر ڈیوٹی صفر ہو جائے گی۔

وزیر خزانہ محمد اورنگزیب نے کمیٹی کو بتایا کہ ٹیرف بہت بنیادی معاملہ ہے اس پر ہمیں سپورٹ کی ضرورت ہے۔ بیگج سکیم کے تحت ابھی صرف تین سال پرانی گاڑیوں کی اجازت ہے۔سینٹ کی قائمہ کمیٹی خزانہ کے اجلاس میں وزارت تجارت حکام نے امپورٹ پالیسی پر بریفنگ دیتے ہوئے بتایا کہ آئی ایم ایف نے اگلے 4 سال میں درآمدی گاڑیوں پر ڈیوٹی صفر کرنے کی شرط رکھی ہے۔

گاڑیوں کی درآمد پر ہر سال ڈیوٹی میں 10 فیصد کمی کی جائے گی۔ چاہے ایک گاڑی امپورٹ کریں یا 200۔ہرگاڑی پر40 فیصد اضافی ڈیوٹی لاگو ہوگی۔حکام کے مطابق انفرادی یا کمرشل استعمال کیلئے 3 سال پرانی گاڑی منگوانے کی پابندی ختم کر دی گئی۔ مالی سال 2027 کے بعد 7 سال تک پرانی گاڑی بھی درآمد کرانے کی اجازت ہو گی۔ مالی سال 2027 سے ہر سال اضافی ڈیوٹی میں بتدریج 10 فیصد کمی کی جائے گی۔

حکام وزارت تجارت کے مطابق پرانی گاڑیوں کی امپورٹ ستمبر 2025 سے شروع ہو جائے گی۔ مستقبل میں 6 اور 7 سال پرانی گاڑیاں درآمد کرنے کی بھی اجازت ہوگی۔ نئی آٹوپالیسی کے تحت بھی درآمدی گاڑیوں پر ڈیوٹیز میں کمی ہونے جارہی ہے۔ آٹو پالیسی کے تحت ٹیرف بہت نیچے آجائے گا۔حکام نے یہ بھی بتایا کہ مالی سال 2027 کے بعد درآمدی گاڑیوں پر اضافی ڈیوٹی ختم اور نارمل ڈیوٹی رہے گی، بیگج میں لائی جانے والی گاڑی پر اضافی 40 فیصد ڈیوٹی عائد نہیں ہو گی۔

بیگج میں لانے والی گاڑی کی سہولت حاصل کرنے کیلئے 7 سو دن اوورسیز لِمٹ ہو گی۔قائمہ کمیٹی نے بیگج سکیم اور کمرشل امپورٹ کے تحت 5 سال پرانی گاڑیاں درآمد کرنے کی سفارش کر دی۔ جس پر حکام وزارت تجارت نے بتایا کہ بیگج سکیم کے تحت بھی ہمیں 40 فیصد اضافی ٹیکس لگانا پڑے گا۔ گفٹ سکیم کے تحت بیرون ملک مقیم شہری اپنی فیملی کو ایک گاڑی گفٹ کر سکتا ہے۔

ایف بی آر حکام کا کہنا تھا کہ 850 سی سی تک گاڑیوں پر ٹیکس 12.5 سے بڑھا کر 18 فیصد کر دیا۔کمیٹی نے گرینڈ پیرنٹ چکن کی درآمد پر عائد ڈیوٹی ختم کرنے کی سفارش کر دی۔ چیئرمین کمیٹی نے کہا کہ پولٹری سیکٹر کا مطالبہ ہے کہ انہیں گرینڈ پیرنٹ چکن کی ڈیوٹی فری امپورٹ کی اجازت دی جائے، حکام نے کہا کہ اس مد میں ایف بی آر کو صرف 30 ملین روپے ریونیو مل رہا ہے۔