پلیئرز نے ثابت کیا پاکستان ہاکی میں اب بھی جان ہے، ہیڈ کوچ طاہر زمان

ہفتہ 21 جون 2025 16:43

کوالالمپور (اُردو پوائنٹ اخبارتازہ ترین - این این آئی۔ 21 جون2025ء)پاکستان ہاکی ٹیم کے ہیڈ کوچ طاہر زمان نے کہا ہے کہ کھلاڑیوں نے ثابت کردیا پاکستان ہاکی میں اب بھی جان ہے۔میڈیا سے گفتگو میں طاہر زمان نے کہا کہ فرانس کے خلاف سیمی فائنل میں کھلاڑیوں نے بہت اچھا کم بیک کیا۔انہوں نے کہا کہ ٹیم ورک کو کریڈٹ جاتا ہے، خسارے کے بعد بھی ہمت نہیں ہاری، کھلاڑیوں نے ثابت کیا ہے کہ پاکستان ہاکی میں اب بھی جان ہے۔

(جاری ہے)

طاہر زمان نے کہا کہ پینلٹی شوٹ آوٹ پر بھی جیت کر دکھا دیا ہے کیونکہ 2 ٹورنامنٹس سے یہ تاثر بن چکا تھا کہ پینلٹی شوٹ آوٹ پر نہیں جیت سکتے۔انہوںنے کہاکہ اچھی ٹیم اسپرٹ تھی، کھلاڑیوں نے غلطیوں سے سیکھا ہے، نیوزی لینڈ کے خلاف بڑا اہم میچ ہے ہم جیت کر پرو ہاکی لیگ کے لیے کوالیفائی کریں گے۔قومی ٹیم کے ہیڈ کوچ نے کہا کہ سیمی فائنل کے لیے پوری قوم نے دعائیں کی ہیں، امید کرتے ہیں کہ فائنل کے لیے بھی سب دعا کریں گے، ہم بھرپور محنت اور کوشش کریں گے کہ فائنل جیتیں۔