Live Updates

والدین اپنے بچوں کو ہر انسدادپولیو مہم کے دوران حفاظتی قطرے ضرور پلوائیں ،ٹیسٹ کرکٹرساجد خان

ہفتہ 21 جون 2025 19:47

راولپنڈی (اُردو پوائنٹ اخبارتازہ ترین - اے پی پی۔ 21 جون2025ء) پاکستان کے معروف ٹیسٹ کرکٹر ساجد خان اور ضلعی ہیلتھ آفیسر ڈاکٹر احسان غنی نے ہفتے کے روز عوامی آگاہی تقریب سے خطاب کرتے ہوئے والدین سے اپیل کی ہے کہ وہ اپنے بچوں کو ہر انسدادمہم کے دوران حفاظتی قطرے ضرور پلوائیں تاکہ پاکستان کو پولیو سے مکمل نجات دلائی جا سکے۔ ساجد خان نے کہا کہ وہ تمام والدین سے درخواست کرتے ہیں کہ ہر بار اپنے بچوں کو پولیو کے قطرے ضرور پلوائیں۔

میری حمایت اس وقت تک جاری رہے گی جب تک پاکستان پولیو سے پاک نہیں ہو جاتا۔ انہوں نے پولیو مہم کے دوران فیلڈ میں کام کرنے والے ورکرز کو خراج تحسین پیش کیا اور عوام سے اپیل کی کہ وہ ان ٹیموں سے بھرپور تعاون کریں کیونکہ وہ صرف بچوں کو معذوری سے بچانے کے لیے گھر گھر آتے ہیں۔

(جاری ہے)

ڈسٹرکٹ ہیلتھ آفیسر ڈاکٹر احسان غنی نے شہریوں سے بات کرتے ہوئے کہا کہ اگر ایک بھی بچہ پولیو کے قطرے پینے سے رہ جائے تو وہ دوسرے بچوں کے لیے خطرہ بن سکتا ہے۔

والدین کو سمجھنا چاہیے کہ پولیو سے بچاؤ کا واحد طریقہ صرف ویکسینیشن ہے۔ ڈاکٹر احسان غنی نے بتایا کہ پاکستان دنیا کے ان چند ممالک میں شامل ہے جہاں اب بھی پولیو وائرس موجود ہے۔ ماحولیاتی نمونوں اور بعض علاقوں میں نئے کیسز اس وائرس کے جاری خطرے کی نشاندہی کرتے ہیں۔ انہوں نے اس عزم کا اظہار کیا کہ حکومت اور اس کے شراکت دار پولیو کے خاتمے کے لیے مکمل طور پر پر عزم ہیں اور ساجد خان جیسے قومی ہیروز کی حمایت عوامی اعتماد اور آگاہی پیدا کرنے میں نہایت اہم ہے۔

مہم کے دوران عوام کو آگاہ کیا گیا کہ پولیو ایک نہایت متعدی وائرس ہے جو بنیادی طور پر پانچ سال سے کم عمر بچوں کو متاثر کرتا ہے۔ یہ اعصابی نظام پر حملہ کرتا ہے جس سے چند گھنٹوں میں مستقل معذوری ہو سکتی ہے۔ پولیو کا کوئی علاج نہیں، صرف بار بار حفاظتی قطرے ہی اس سے بچاؤ کا ذریعہ ہیں۔