گوجرانوالہ، نشئی باپ کا بیٹیوں پر شدید تشدد ایک بیٹی کو قتل کر ڈالا، ملزم گرفتار

ملزم کمرے میں آئس کا نشہ کررہا تھا بیٹیاں کمرے میں گئیں تو ملزم نے ڈنڈوں سے بیٹیوں کو مارنا شروع کردیا،دو بچیاں بارہ سالہ ماہم اورتین سالہ جنت شدید زخمی ہو گئیں جنہیں فوری طور پرہسپتال منتقل کر دیا گیا،پولیس نے ملزم کو گرفتار کرکے مقدمہ در ج کرلیاہے

فیصل علوی ہفتہ 21 جون 2025 16:05

گوجرانوالہ، نشئی باپ کا بیٹیوں پر شدید تشدد ایک بیٹی کو قتل کر ڈالا، ..

گوجرانوالہ(اردوپوائنٹ اخبار تازہ ترین۔21جون 2025)گوجرانوالہ،میں نشئی باپ کا بیٹیوں پرشدید تشدد، ایک بیٹی کوقتل کر ڈالا، واقعے کے وقت بچیوں کی والدہ گھر میں موجود نہیں تھی، باپ کے وحشیانہ تشدد سے 7 سالہ بیٹی جاں بحق اور 2 زخمی ہوگئیں،واقعہ کی اطلاع ملتے ہی پولیس کی بھاری موقع پر پہنچ گئی لاش اور زخمی بچیوں کو ہسپتال منتقل کر دیاگیا،پولیس نے ملزم کو گرفتار کرلیا،بتایا گیا ہے کہ ملزم کمرے میں آئس کا نشہ کررہا تھا بیٹیاں کمرے میں گئیں تو ملزم نے ڈنڈوں سے بیٹیوں کو مارنا شروع کردیا۔

دو بچیاں بارہ سالہ ماہم اورتین سالہ جنت شدید زخمی ہو گئیں جنہیں فوری طور پرہسپتال منتقل کر دیا گیا۔پولیس کے مطابق واقعہ گوجرانوالہ کے ایک رہائشی علاقے میں پیش آیا۔ملزم نشے کی حالت میں کمرے میں موجود تھا اور ”آئس“ نامی منشیات استعمال کر رہا تھا۔

(جاری ہے)

اسی دوران اس کی کمسن بیٹیاں کمرے میں آگئیں جس پر ملزم نے بے قابو ہو کر ڈنڈوں سے مارنا شروع کر دیا۔

تشدد سے 7 سالہ بچی موقع پر ہی دم توڑ گئی جبکہ دو بہنیں زخمی حالت میں ہسپتال منتقل کی گئیں۔پولیس حکام نے تصدیق کی ہے کہ واقعے کے وقت بچیوں کی والدہ گھر پر موجود نہیں تھی۔ ابتدائی تحقیقات کے مطابق خاندانی تنازعات اور نشے کی لت اس المیے کی ممکنہ وجوہات میں شامل ہیں۔پولیس کا یہ بھی کہنا ہے کہ ملزم کو گرفتار کرکے مزید تحقیقات شروع کر دی گئیں ہیں۔

ملزم کے خلاف قتل، اقدامِ قتل اور چائلڈ پروٹیکشن ایکٹ کے تحت مقدمہ درج کیا گیا ہے۔واقعے کی مزید تفتیش جاری ہے اور بچیوں کے میڈیکل رپورٹس کا انتظار ہے۔اہل علاقہ کے مطابق باپ کمرے میں نشہ کر رہا تھا کہ بچیاں چلی گئیں۔ ملزم امجد آئس کے نشے کا عادی ہے۔ واقعے کے وقت بچیوں کی ماں گھرسے باہر تھی۔دریں اثناء واقعے پر شہریوں، سماجی تنظیموں اور سوشل میڈیا صارفین نے شدید غم و غصے کا اظہار کرتے ہوئے ملزم کو عبرتناک سزا دینے کا مطالبہ کیا۔عوامی حلقوں نے اس کے ساتھ ساتھ نشے کے عادی افراد کی بحالی اور بچوں کے تحفظ کیلئے قانون سازی پر زور دیا ہے۔