عمان ذاتی آمدن پر ٹیکس لگانے والا پہلا خلیجی ملک بن گیا

ذاتی انکم ٹیکس قانون کے تحت انکم ٹیکس متعارف کرانے کا مقصد حکومت کے آمدنی کے ذرائع کو متنوع بنانا اور تیل کی آمدنی پر انحصار کم کرنا ہے؛ عمانی ٹیکس اتھارٹی کا بیان

ساجد علی پیر 23 جون 2025 16:13

مسقط ( اُردو پوائنٹ اخبارتازہ ترین۔ 23 جون2025ء ) عمان ذاتی آمدن پر ٹیکس لگانے والا پہلا خلیجی ملک بن گیا، اس حوالے سے قانون 2028ء کے آغاز میں نافذ العمل ہو جائے گا۔ خلیجی میڈیا کے مطابق عمانی ٹیکس اتھارٹی کا کہنا ہے کہ حکومت نے ٹیکس سے متعلق ایک شاہی فرمان جاری کیا ہے جس کے ساتھ ہی عمان خلیج میں ذاتی آمدن پر ٹیکس عائد کرنے والا پہلا ملک بن گیا، ذاتی انکم ٹیکس قانون کے تحت انکم ٹیکس متعارف کرانے کا مقصد حکومت کے آمدنی کے ذرائع کو متنوع بنانا اور تیل کی آمدنی پر انحصار کم کرنا ہے۔

شاہی حکم نامہ میں کہا گیا ہے کہ 2028ء سے ہر سال 42 ہزار عمانی ریال سے زیادہ کمانے والے افراد کے لیے ان کی آمدنی پر 5 فیصد ٹیکس عائد کیا جائے گا، نئے قانون میں وہ کٹوتیاں اور استثنیٰ بھی شامل ہیں جو سلطنتِ عمان میں سماجی صورتِ حال کو مدِنظر رکھتے ہیں ان میں تعلیم، صحت، وراثت، زکوٰۃ، عطیات اور بنیادی رہائش نمایاں ہیں۔

(جاری ہے)

بتایا جارہا ہے ہ متحدہ عرب امارات اور دیگر خلیجی ممالک نے ویلیو ایڈڈ ٹیکس (VAT) اور کارپوریٹ انکم ٹیکس متعارف کرایا اس کے علاوہ متحدہ عرب امارات نے تمباکو اور کاربونیٹیڈ مشروبات پر بھی ٹیکس عائد کیا تاکہ رہائشیوں میں صحت مند طرز زندگی کی حوصلہ افزائی کی جا سکے۔

پرسنل انکم ٹیکس پروجیکٹ کی ڈائریکٹر کریمہ مبارک السعدی نے بتایا کہ ٹیکس کے نفاذ کے لیے تمام ضروری تیاریاں اور تقاضے مکمل کر لیے گئے ہیں، تاہم کچھ چھوٹ بھی موجود ہیں، اس قانون میں سلطنت عمان میں سماجی تحفظات جیسے تعلیم، صحت کی دیکھ بھال، وراثت، زکوٰۃ، عطیات، بنیادی رہائش اور دیگر عوامل کو مدنظر رکھتے ہوئے کٹوتیاں اور چھوٹ بھی شامل کی گئی ہیں، ذاتی انکم ٹیکس کے نفاذ سے پہلے ایک مکمل مطالعہ کیا گیا جس میں احتیاط سے استثنیٰ کی حد پر غور کیا گیا جس سے یہ بات سامنے آئی تھی کہ عمان کی تقریباً 99 فیصد آبادی اس ٹیکس کے تابع نہیں ہوگی۔

اس حوالے سے اوریفر مڈل ایسٹ ٹیکس کنسلٹنسی کے بانی پارٹنر تھامس وانہی کا کہنا ہے کہ یہ قانون شہریوں اور رہائشیوں سمیت تمام افراد پر لاگو ہوگا، عمان اب جی سی سی کا پہلا ملک ہے جس نے ذاتی انکم ٹیکس کے نظام کی قانون سازی کی ہے جو خود کو دوسرے خلیجی دائرہ اختیار سے ممتاز کرتا ہے جو اب بھی ذاتی انکم ٹیکس نہیں لگاتے، یہ آئی ایم ایف سے چلنے والی تنوع کی حکمت عملیوں کی عکاسی کر سکتا ہے جو عمان ویژن 2040ء کے ساتھ ہم آہنگ ہے۔