آل پاکستان پی ایس کیو سی اے ملازمین کی بونس اور میڈیکل بندش کیخلاف قلم چھوڑ ہڑتال اور تالہ بندی

ٰملازم عدیل مینجمنٹ کی غلط پالیسیوں کی بھینٹ چڑھ گیا،میڈیکل نہ ملنے کے باعث جان کی بازی ہار گیا

پیر 23 جون 2025 22:00

لله*لاہور (اُردو پوائنٹ اخبارتازہ ترین - آن لائن۔ 23 جون2025ء) پاکستان سٹینڈرڈز اینڈ کوالٹی کنٹرول اتھارٹی کے ملازمین ششماہی بونس ااور میڈیکل سہولتوں کی عدم فراہمی پر ملک گیر قلم چھو ڑ ہڑتال پر بیٹھ گئے ہیں۔گوجرانوالہ دفتر کا ملازم عدیل مینجمنٹ کی غلط پالیسیوں کی بھینٹ چڑھ گیا۔طبیت ناساز ہونے پر عدیل کو لاہور لایا گیا مگر پینل ہسپتال میں علاج نہ ہو سکا کیونکہ سینئیر مینجمنٹ کی نااہلی کی وجہ سے پینل ہسپتالوں کو رقوم کی ادائیگی نہیں ہو سکی اور سروسز بند ہیں۔

اس پر عدیل کو جناح ہسپتال لے جایا گیا مگر جانبر نہ ہو سکا۔ ملازمین بتاتے ہیں کہ احتجاج عید سے پہلے سے جاری ہے ۔ عید سے پہلے ڈائریکٹر ٹو منسٹر شکیل ارشد صاحب نے ہمارے لاہور دفتر کا دورہ کیا اور سب ملازمین سے وعدہ کیا کہ عید کے بعد ایک ہفتے کے اندر مسائل حل کروا دوں مگر مسائل جوں کے توں ہیں لہذا ملازمین پھر سراپا احتجاج ہیں۔

(جاری ہے)

ملازمین کو مینجمنٹ کی جانب سے سنگین نتائج کی دھمکیوں کا بھی سامنا ہے ۔

چئیرمین ایمپلایز یونین محمد طارق کا کہنا ہے کہ ہمارے گھروں کے چولہے بجھ چکے اور مینجمنٹ مسائل حل کرنے کی بجائے مزید الجھائو کی جانب لے جا رہی ہے ملازمین متحد ہیں اور ہر صورت اپنا حق حاصل کریں گے ۔ملازمین کا ششماہی بونس اور میڈیکل بند کر کے ملازمین کا استحصال کیا جا رہا ہے، منسٹر خالد مگسی معاملات فوری حل کروائیں۔