ارکان آپس میں دست و گریباں ہوں تو قومی اسمبلی کا سٹاف بیچ بچائو کرا ئے ، سپیکر قومی اسمبلی کی ہدایت

پیر 23 جون 2025 22:30

اسلام آباد (اُردو پوائنٹ اخبارتازہ ترین - اے پی پی۔ 23 جون2025ء) سپیکر قومی اسمبلی سردار ایاز صادق نے کہا ہے کہ ارکان کے درمیان کسی قسم کی ہاتھا پائی کی صورت میں قومی اسمبلی کے سٹاف کو یہ ہدایت ہے کہ وہ بیچ بچائو کرائے یہ سٹاف حکومت یا اپوزیشن کسی ایک کا نہیں بلکہ سب کا ہے۔ پیر کو قومی اسمبلی میں پیپلز پارٹی اور پی ٹی آئی کے اراکین کے درمیان ہونے والے ناخوشگوار واقعہ کے بعد اجلاس دوبارہ شروع ہوا تو ڈاکٹر نثار جٹ نے کہا کہ میں نے اس ایوان کے تقدس کو بارہا دیکھا ہے، میں تین بار اس ایوان کا رکن بنا ہوں، میں نے کبھی جذباتی تقریر نہیں کی، اگر اس ایوان میں بیٹھے کسی رکن کی میرے الفاظ کی وجہ سے دل آزاری ہوئی ہو تو میں معذرت خواہ ہوں، ہم نے اس ایوان کو آگے لے کر چلنا ہے۔

آغا رفیع اللہ نے کہا کہ اس پارلیمان و جمہوریت کیلئے ہماری قیادت نے اپنی جانوں کا نذرانہ پیش کیا ہے، ایوان میں جو کچھ ہوا اسے درگزر کرتے ہیں۔

(جاری ہے)

سپیکر قومی اسمبلی نے کہا کہ معزز ممبران سے استدعا ہے کہ قومی اسمبلی کے سٹاف کو اپنا سمجھیں یہ سب کا ہے، ان کو یہ ذمہ داری میں نے دی ہے کہ اگر کہیں خدشہ ہو کہ ارکان ایک دوسرے سے دست و گریباں ہوں گے تو ان کا بیچ بچائو کرائیں، یہ کسی کو ہاتھ لگانے کے متحمل نہیں۔

یہ حکومت اور اپوزیشن دونوں کے سامنے جوابدہ ہیں، ان کا تحفظ بھی ارکان کی ذمہ داری ہے۔ انہوں نے کہا کہ یہ پارلیمنٹ ہم سب کا ہے، حکومت اور اپوزیشن اس کے دو پہیے ہیں، ہم عوام کو جوابدہ ہیں کہ ان کیلئے کام کریں، ایک دوسرے کی عزت اور احترام سے بات کرنے سے مسائل کا حل نکل سکتا ہے، ہمیں معاملہ فہمی کی طرف جانا چاہئے۔ انہوں نے کہا کہ میری دعا ہے کہ پارلیمان بہتری کی جانب جائے اور یہاں پر ایشوز پر بات ہو۔

قبل ازیں قومی اسمبلی کے اجلاس میں غیر تصویبی اخراجات پر بحث کے دوران جب اپوزیشن رکن نثار جٹ نے بلاول بھٹو زرداری کے حوالے سے نامناسب الفاظ استعمال کئے تو پیپلز پارٹی نے اس پر احتجاج کیا اس دوران نثار جٹ اور آغا رفیع اللہ میں جھڑپ ہو گئی تاہم اراکین نے بڑی مشکل سے بیچ بچائو کرایا بعد ازاں دیگر اراکین بھی اس میں شامل ہو گئے اور اجلاس ڈپٹی سپیکر کو کچھ دیر کیلئے ملتوی کرنا پڑا۔