ایران سے132کے وی پیشن۔مند اور132 کے وی پولان۔جیوانی ٹرانسمیشن لائنز سے بجلی کی فراہمی معطل ہوگئی

منگل 24 جون 2025 00:00

کوئٹہ (اُردو پوائنٹ اخبارتازہ ترین - اے پی پی۔ 24 جون2025ء) کوئٹہ الیکٹرک سپلائی کمپنی (کیسکو) کے ترجمان نے کہاہے کہ پیر کے روز تقریباً ڈھائی بجے ہمسایہ ملک ایران سے132کے وی پیشن۔مند اور132کے وی پولان۔جیوانی ٹرانسمیشن لائنز سے بجلی کی فراہمی معطل ہوگئی۔ایران سے مذکورہ 132کے وی کی دونوں ٹرانسمیشن لائنز سے بجلی کی فراہمی معطل ہونے سے مکران ڈویژن کے تمام گرڈ اسٹیشنز کو بجلی کی فراہمی متاثرہوئی۔

(جاری ہے)

ترجمان نے کہاکہ مکران ڈویژن کے 132کے وی مند، تُمپ، تُربت، ہوشاب، پنجگور، جیوانی، گوادر ڈور، گوادر ڈیپ سی پورٹ، نیو گوادار انٹرنیشنل ایئر پورٹ،پسنی اور اورماڑہ گرڈ اسٹیشنزکو بجلی کی فراہمی متاثرہوگئی۔ ترجمان نے مزیدکہاکہ پیر کے روز شام 5بجے کے قریب کیسکونے مکران ڈویژن کو نیشنل گرڈ سے منسلک کر کے بجلی کی فراہمی بحال کر دی جسکے بعد تمام فیڈروں کو بھی مرحلہ وار بجلی کی فراہمی شروع کردی گئی جس کے بعد اب معمول کے مطابق تمام فیڈروں کو بجلی کی فراہمی جاری ہے۔ تاہم ایران سے بجلی کی دوبارہ بحالی کے سلسلے میں کیسکوانتظامیہ ایرانی حکام سے مسلسل رابطے میں ہیں اور ایران سے بجلی بندش پرزحمت کیلئے مکران کے صارفین سے کیسکومعذرت اور تعاون کی اپیل کرتی ہے۔