اداکارہ عائشہ خان کو بچوں کے گھروں میں رہنا پسند نہیں تھا کیونکہ وہ اپنی تنہائی میں مطمئن تھیں،بشری انصاری

بغیر تحقیق کے بچوں پر الزامات نہ لگائیں نہ جانے وہ کتنی تکلیف سے گزر رہے ہوں گے اور مرحومہ کے لیے دعائے مغفرت کریں،اداکارہ کی اپیل

منگل 24 جون 2025 17:35

اداکارہ عائشہ خان کو بچوں کے گھروں میں رہنا پسند نہیں تھا کیونکہ وہ ..

کراچی(اُردو پوائنٹ اخبارتازہ ترین - این این آئی۔ 24 جون2025ء)معروف اداکارہ عائشہ خان کی کراچی میں تنہائی میں موت اور کئی روز بعد لاش ملنے پر سوشل میڈیا پر ان کے بچوں کو تنقید کا نشانہ بنایا جا رہا ہے۔ ایسے میں سینئر اداکارہ بشری انصاری نے ایک ویڈیو پیغام میں بچوں سے متعلق اہم وضاحت دی ہے۔بشری انصاری نے بتایا کہ انہوں نے چند سال قبل عائشہ خان سے ایک پروجیکٹ کے دوران بات کی تھی جس میں انہوں نے بتایا تھا کہ ان کے بچے بیرونِ ملک مقیم ہیں اور ان سے رابطے میں رہتے ہیں۔

اداکار کے مطابق عائشہ خان نے کہا تھا کہ بچے ان کا خیال رکھتے ہیں، یہاں تک کہ جاتے ہوئے درازوں میں پیسے بھی رکھ دیتے ہیں، لیکن انہیں بچوں کے گھروں میں رہنا پسند نہیں تھا کیونکہ وہ اپنی تنہائی میں مطمئن تھیں۔

(جاری ہے)

بشری انصاری نے کہا کہ عائشہ خان اپنی مرضی کی زندگی گزار رہی تھیں، کتابیں پڑھتی تھیں، عبادت کرتی تھیں اور پڑوسیوں سے میل جول رکھتی تھیں اور اسی میں خوشی محسوس کرتی تھیں کیونکہ ان کا بچوں کے گھر میں دل نہیں لگتا تھا۔

اداکارہ نے لوگوں سے اپیل کی کہ بغیر تحقیق کے بچوں پر الزامات نہ لگائیں نہ جانے وہ کتنی تکلیف سے گزر رہے ہوں گے اور مرحومہ کے لیے دعائے مغفرت کریں۔یاد رہے کہ عائشہ خان کی لاش گلشن اقبال میں ان کے فلیٹ سے ملی تھی جوکہ ایک ہفتہ قبل انتقال کر گئیں تھیں تاہم پڑوسیوں کی اطلاع پر پولیس ان کے فلیٹ پہنچی اور ان کی لاش برآمد ہوئی۔