ایران اسرائیل سے خوش نہیں ہوں، دونوں نے جنگ بندی کی خلاف ورزی کی ہے، ٹرمپ

دی ہیگ(اردوپوائنٹ اخبار تازہ ترین۔24جون 2025)امریکی صدر ڈونلڈ ٹرمپ کا کہنا ہے کہ ایران اسرائیل دونوں سے خوش نہیں ہوں، دونوں نے جنگ بندی کی خلاف ورزی کی ہے، مجھے یہ پسند نہیں آیا کہ اسرائیل نے جنگ بندی پر رضامندی کے فوراً بعد حملے کئے، نیٹو سربراہی اجلاس میں شرکت کیلئے روانگی سے قبل دی ہیگ ایئر پورٹ پر صحافیوں سے گفتگو کرتے ہوئے امریکی صدر نے کہا کہ اسرائیل ابھی اپنے پائلٹس واپس بلاؤ،بم نہ گرانا، اگر ایسا کیا تو یہ جنگ بندی کی خلاف ورزی ہوگی۔

امریکی صدر نے کہا کہ اسرائیل اور ایران دونوں نے اس جنگ بندی کی خلاف ورزی کی ہے جس کا اعلان انہوں نے چند گھنٹے قبل کیا تھا اور وہ اس پر دونوں ممالک سے ناخوش ہیں۔ خاص طور پر اسرائیل سے جس نے معاہدے پر رضامندی کے فوراً بعد ''حملے شروع کر دئیے۔

(جاری ہے)

  ٹرمپ نے یہ بھی دعویٰ کیا کہ ایران کی جوہری صلاحیتیں اب ختم ہو چکی ہیں۔ایران کبھی بھی اپنا جوہری پروگرام دوبارہ نہیں بنائے گا۔

امریکی صدر ڈونلڈ ٹرمپ نے اسرائیل اور ایران، دونوں کو جنگ بندی کی خلاف ورزی کا مرتکب قرار دیا اور اسرائیل پر شدید برہمی کا اظہار بھی کیا۔امریکی صدر نے کہا کہ میں ایران سے بھی خوش نہیں ہوں لیکن اسرائیل سے شدید ناراض ہوں۔امریکی صدر نے اسرائیل کو خبردار کرتے ہوئے کہا کہ ایران پر ہرگز بم مت گرانا، اگر ایسا کیا تو یہ جنگ بندی کی سنگین خلاف ورزی ہوگی، ابھی اپنے پائلٹس کو واپس بلاؤ۔

یاد رہے کہ اس سے قبل اسرائیل نے جنگ بندی نفاذ کے چند گھنٹوں بعد ایران کی جانب سے اسرائیل پر میزائل حملے کا الزام لگا یا تھا۔ اسرائیلی وزیر دفاع نے تہران کو نشانہ بنانے کا حکم بھی دیا۔ایرانی فوج کابھی کہنا تھا کہ اسرائیل نے جنگ بندی کی خلاف ورزی کرتے ہوئے تین حملے کئے تھے۔ اسرائیلی فوج کا کہنا ہے کہ ایران سے داغے گئے 2 میزائل تباہ کردیئے تھے۔

ایرانی میزائل فائر ہونے کے بعد کئی اسرائیلی شہروں میں خطرے کے سائرن بج رہے تھے۔ ایران نے اسرائیل فوج کا الزام مسترد کرتے ہوئے کہا ہے سیز فائر نافذ ہونے کے بعد کوئی میزائل نہیں داغا گیا تھا۔اسرائیلی فوج کے ترجمان کامزید یہ بھی کہنا تھا کہ جنگ بندی کا آغاز آج صبح ہوچکا تھا۔ خطرہ اب بھی برقرار ہے، عوامی حفاظتی پابندیوں میں کوئی تبدیلی نہیں ہوئی تھی۔

قبل ازیں امریکی صدر ڈونلڈ ٹرمپ کے اعلان کے بعد ایران اور اسرائیل کے درمیان جنگ بندی کا وقت شروع ہوگیا تھا۔ ایران نے اسرائیل پر میزائیل حملوں کے بعد جنگ بندی کے نفاذ کا اعلان کردیا تھا جبکہ نیتن یاہو نے بھی جنگ بندی کی تجویز قبول کرلی تھی۔ٹرمپ نے اپنے تازہ بیان میں کہا تھا کہ کوئی فریق بھی سیز فائر کیخلاف ورزی نہ کرے۔امریکی صدرٹرمپ نے یہ اعلان اپنے سوشل میڈیا پلیٹ فارم ’ٹروتھ سوشل‘ پر کیاتھا جہاں انہوں نے لکھا تھا کہ مبارک ہو دنیا، ایران اور اسرائیل نے جنگ بندی پر اتفاق کر لیا گیا تھا۔