ڈپٹی چیئرمین سینیٹ سیدال خان کا سینیٹر بلال مندوخیل کی والدہ محترمہ کے انتقال پر اظہارِ تعزیت

منگل 24 جون 2025 20:30

کوئٹہ(اُردو پوائنٹ اخبارتازہ ترین - این این آئی۔ 24 جون2025ء)ڈپٹی چیئرمین سینیٹ سیدال خان نے سینیٹر بلال مندوخیل کی والدہ محترمہ کے انتقال پر گہرے دکھ اور افسوس کا اظہار کیا ہے۔ اپنے تعزیتی بیان میں انہوں نے کہا کہ والدہ کا رخصت ہو جانا ایک ناقابل تلافی نقصان اور زندگی کا ایسا صدمہ ہے جس کی تلافی ممکن نہیں۔ ماں ایک عظیم اور بے لوث رشتہ ہے، انہوں نے دعا کی کہ اللہ تعالیٰ مرحومہ کو اپنے جوارِ رحمت میں اعلیٰ مقام عطا فرمائے، ان کی مغفرت فرمائے، اور پسماندگان کو یہ عظیم صدمہ صبر و حوصلے کے ساتھ برداشت کرنے کی توفیق دے۔

ڈپٹی چیئرمین سینیٹ سیدال خان نے سابق نگران وزیراعلیٰ بلوچستان و سابق سینیٹر میر محمد نصیر مینگل کے فرزند عطا الرحمٰن مینگل پر ہونے والے قاتلانہ حملے کی شدید الفاظ میں مذمت کی ہے۔

(جاری ہے)

انہوں نے اس المناک واقعے کو دلخراش قرار دیتے ہوئے گہرے رنج و غم کا اظہار کیا۔ڈپٹی چیئرمین سینیٹ نے انتہائی دکھ وافسوس کا اظہار کیا، اور عطا الرحمٰن مینگل فائرنگ کے نتیجے میں جاں بحق ہونے پر مرحوم کے درجات کی بلندی اور مغفرت کے لیے دعا کی۔

انہوں نے متاثرہ خاندان کے لیے صبرِ جمیل کی بھی دعا کی۔سیدال خان نے کہا کہ دکھ کی اس گھڑی میں میر نصیر مینگل اور ان کے اہلِ خانہ کے ساتھ کھڑے ہیں۔ڈپٹی چیئرمین سینیٹ نے قاتلانہ حملے میں زخمی ہونے والے میر نصیر مینگل کے پوتے کی جلد صحت یابی کے لیے بھی نیک تمناؤں اور دعا کا اظہار کیا۔