دہشتگردی کے خلاف جنگ میں پوری قوم سکیورٹی فورسز کے ساتھ ہے، وزیر اعلیٰ خیبرپختونخوا علی امین خان گنڈاپور

منگل 24 جون 2025 21:30

پشاور (اُردو پوائنٹ اخبارتازہ ترین - اے پی پی۔ 24 جون2025ء) وزیر اعلیٰ خیبرپختونخوا علی امین خان گنڈاپور نے جنوبی وزیرستان کے علاقہ سراروغہ میں دہشتگردوں کے خلاف سکیورٹی فورسز کی کارروائی کے دوران میجر معیز عباس شاہ اور لانس نائیک جبران اللہ کی شہادت پر افسوس کا اظہار کیا ہے۔

(جاری ہے)

وزیر اعلیٰ نے شہداءکے اہل خانہ سے دلی ہمدردی اور تعزیت کا اظہار کرتے ہوئے شہداءکے درجات کی بلندی اور پسماندگان کے لیے صبر جمیل کی دعا کی ہے۔

وزیر اعلیٰ نے کہا کہ وہ شہداءکے اہل خانہ کے غم میں برابر کے شریک ہیں اورملک و قوم کی خاطر جانیں قربان کرنے والے اہلکاروں اور ان کے اہل خانہ کو سلام پیش کرتے ہیں۔ وزیر اعلی نے کہا کہ ملک میں امن کےلئے سکیورٹی فورسز نے لازوال قربانیاں دی ہیں، سکیورٹی فورسز کے جوانوں کی یہ قربانیاں رائیگاں نہیں جائیں گی۔ دہشتگردی کے خلاف جنگ میں پوری قوم سکیورٹی فورسز کے ساتھ ہے۔