Live Updates

ایک دن کیلئے نتھیا گلی گیا، سوشہ چھوڑ دیا گیا کسی سے ملاقات کی ہے، علی امین گنڈاپور

جو بجٹ ہم نے دیا ہے، وہ تمام پیش کیے گئے بجٹوں میں سب سے بہترین ہے، وزیراعلی خیبرپختونخوا

بدھ 25 جون 2025 13:26

ایک دن کیلئے نتھیا گلی گیا، سوشہ چھوڑ دیا گیا کسی سے ملاقات کی ہے، علی ..

اسلام آباد (اُردو پوائنٹ اخبارتازہ ترین - این این آئی۔ 25 جون2025ء)وزیراعلی خیبرپختونخوا علی امین گنڈا پور نے سپریم کورٹ کے باہر میڈیا سے گفتگو کرتے ہوئے کہا ہے کہ وہ بانی پی ٹی آئی کی ہدایت پر عدالت آئے ہیں اور کئی دنوں سے ان سے ملاقات کی کوششیں جاری تھیں، لیکن ایک منظم سازش کے تحت انہیں روکا جا رہا ہے۔علی امین گنڈا پور نے کہا، یہ کوئی اتفاق نہیں، بلکہ ہمارے خلاف ایک سازش ہو رہی ہے۔

بانی پی ٹی آئی نے ہمیں خود کہا کہ سپریم کورٹ جائیں، اسی لیے میں آج یہاں آیا ہوں۔انہوں نے بتایا کہ کمرہ عدالت میں جسٹس منصور علی شاہ موجود تھے اور انہوں نے بولنے کا موقع دیا۔ میں نے جسٹس منصور کو بانی پی ٹی آئی کے خط کے حوالے سے آگاہ کیا۔ ہمارا مینڈیٹ چوری کیا گیا اور 26ویں آئینی ترمیم کے بعد عدلیہ کو عملی طور پر ہتھکڑیاں لگا دی گئیں۔

(جاری ہے)

وزیراعلی نے کہا کہ وہ ایک پاکستانی کی حیثیت سے ملک کے لیے قربانیاں دے چکے ہیں اور اب بھی اداروں سے امید رکھتے ہیں کہ انصاف ہوگا۔ بطور وزیراعلی میں یہاں آیا ہوں، ارادہ تھا کہ چیف جسٹس سے بھی گفتگو ہو، امید ہے ہماری درخواست جلد سماعت کے لیے مقرر ہو گی۔بجٹ سے متعلق سوال پر علی امین گنڈا پور کا کہنا تھا، بانی پی ٹی آئی کا وژن سب کے سامنے ہے۔

جو بجٹ ہم نے دیا ہے، وہ تمام پیش کیے گئے بجٹوں میں سب سے بہترین ہے۔انہوں نے مائنس بانی پی ٹی آئی کے بیانیے کو سختی سے مسترد کرتے ہوئے کہا، ایسی باتیں محض مفروضے ہیں، جو لوگ یہ باتیں کر رہے ہیں وہ عقل سے عاری ہیں۔ بانی پی ٹی آئی کے ہوتے ہوئے مجھے کسی بڑے عہدے کی خواہش نہیں، ایسی باتیں کرنا محض بیوقوفی ہے۔علی امین گنڈا پور نے نتھیا گلی میں قیام سے متعلق بھی وضاحت کرتے ہوئے کہا، میں صرف ایک دن کے لیے وہاں گیا تھا، اور کل ایک نیا سوشہ چھوڑ دیا گیا کہ میری کسی سے ملاقات ہوئی ہے۔

یہ سب جھوٹ ہے، صرف پیسے کمانے کے لیے یہ افواہیں پھیلائی جا رہی ہیں۔وزیراعلی نے گفتگو کے اختتام پر واضح کیا کہ، بانی پی ٹی آئی ہی ہماری سیاست کی ترجیح ہیں، اور ہم ان کے ہر فیصلے کے ساتھ کھڑے ہیں۔