کمشنر مظفرآباد کی زیر صدارت مون سون کے دوران ممکنہ خطرات سے نمٹنے کیلئے اجلاس

بدھ 25 جون 2025 22:40

مظفرآباد (اُردو پوائنٹ اخبارتازہ ترین - اے پی پی۔ 25 جون2025ء) کمشنر مظفرآباد ڈویژن چوہدری گفتار کی زیر صدارت مون سون کے دوران ممکنہ خطرات سے نمٹنے کیلئے ایمرجنسی رسپانس پلان کے حوالے اجلاس منعقد ہوا۔اجلاس میں ڈی آئی جی مظفرآباد ریجن یاسین قریشی، ڈپٹی کمشنر مظفرآباد مدثر فاروق، مئیر بلدیہ مظفرآباد سید سکندر گیلانی،ایس ای برقیات، ڈسٹرکٹ ہیلتھ آفیسر مظفرآبادڈاکٹر عبدالمتین، ڈسٹرکٹ فوڈ کنٹرولر مظفرآباد ابرار احمد میر، آفیسر اطلاعات محمد حنیف و دیگر نے شرکت کی۔

اجلاس میں ڈپٹی کمشنر نیلم ندیم احمد جنجوعہ، ڈپٹی کمشنر جہلم ویلی محترمہ بینش جرال، ایس پی نیلم، ایس پی جہلم ویلی محکمہ صحت، خوراک کے ضلعی آفیسران و دیگر نے ویڈیو لنک کے ذریعے خصوصی طور پر شرکت کی۔

(جاری ہے)

اجلاس میں آمدہ مون سون کے دوران ممکنہ خطرات سے نمٹنے کیلئے انتظامات اور دستیاب وسائل کا جائزہ لیا گیا۔ اس موقع پر کمشنر مظفرآباد ڈویژن چوہدری گفتار نے کہا کہ وزیراعظم آزادکشمیر کے خصوصی احکامات کی روشنی میں آمدہ مون سون کے دوران الائیڈ ڈیپارٹمنٹس کے ساتھ موثر رابطہ کاری قائم کرتے ہوئے جنگی بنیادوں پر کنٹرول روم قائم کیا جائے گا اور ریسکیو اداروں سمیت ضروری سروسز کے محکمہ جات کی چھٹی منسوخ کی گئی ہے۔

مون سون کے خطرات سے آگاہی کیلئے محکمہ اطلاعات کے ذریعے عوامی آگاہی مہم چلائی جائے گی۔ ڈی ڈی ایم اے الائیڈ محکمہ جات کے ساتھ مل کر مون سون کے خطرات سے نمٹنے کیلئے موثر پلان ترتیب دے۔ کمشنر مظفرآباد ڈویژن نے کہا کہ امسال 10 سے 15 فی صد زیادہ بارشیں متوقع ہیں اورندی نالوں میں پانی اور طغیانی اور کلاوڈ برسٹ کے زیادہ امکانات ہیں، ندی نالوں کے ارد گرد عوام کو محفوظ مقامات پر منتقل ہونے کیلئے نوٹس جاری کئے جائیں گے۔

کمشنر مظفرآباد نے متعلقہ محکمہ جات کو متاثرہ آبادی کیلئے متبادل رہائشی انتظامات اور ندی نالوں کی صفائی، نیلم، جہلم دریا کے انٹری پوائنٹس پر پانی کے بہاو کی باقاعدگی کے ساتھ مانیٹرنگ، سول ڈیفنس اور ریسکیو اداروں سے ایمرجنسی صورتحال کے دوران موثر رابطہ کاری اور شاہرات کی بحالی کیلئے سرکاری مشینری کے استعمال کی ہدایت کی۔ انہوں نے کہا کہ دور دراز اور دشوار علاقوں میں ڈاکٹرز کی فراہمی کے علاوہ ادویات اور خوراک سٹاک کی جائے۔