پنجاب فوڈ اتھارٹی کا لاہور میں بڑا کریک ڈائون، ناقص دودھ فروخت کرنے والوں کےخلاف کارروائی

بدھ 25 جون 2025 22:50

لاہور (اُردو پوائنٹ اخبارتازہ ترین - اے پی پی۔ 25 جون2025ء) پنجاب فوڈ اتھارٹی نے علی الصبح لاہور میں بڑا کریک ڈائون کیا جس میں ڈی جی فوڈ اتھارٹی عاصم جاوید نے فوڈ سیفٹی ٹیموں کے ہمراہ382دودھ بردار گاڑیوں میں 4لاکھ 94ہزار لٹر دودھ کی چیکنگ کرتے ہوئے21کو 2لاکھ 57ہزار سے زائد کے جرمانے عائدکردئیے جبکہ 3ہزار 600لٹر ملاوٹی دودھ تلف کر دیا گیا۔

(جاری ہے)

جاری تفصیلات میں بتایا گیا کہ موقع پر کیے گئے ٹیسٹ ناقص پائے جانے پر کارروائی عمل میں لائی گئی، دودھ میں قدرتی چکنائی کم اور پانی کی ملاوٹ پائی گئی، علی الصبح گجومتہ، سگیاں، بابوصابو، شاہدرہ، ملتان روڈ اور اڈا پلاٹ سے آنے والے دودھ کی چیکنگ کی گئی۔

ڈی جی فوڈ اتھارٹی کے مطابق ملاوٹی دودھ لاہور شہر میں مختلف سوسائٹیز میں سپلائی کیا جانا تھا، دودھ جیسی بنیادی غذا میں ملاوٹ سنگین جرم ہے، شہروں میں آنے والے دودھ کی تفصیلی ٹیسٹنگ کے بعد ہی سپلائی کی اجازت دی جاتی ہے، گزشتہ سالوں کی نسبت دودھ تلف شرح میں ریکارڈ کمی بہتری کا منہ بولتا ثبوت ہے، شہری گھروں میں استعمال ہونے والے دودھ کو پنجاب فوڈ اتھارٹی دفتر سے مفت ٹیسٹ کروا سکتے ہیں۔