’لاالٰہ الاللہ‘ کی صداؤں کیساتھ وطن پر قربانی کا عہد،نیا ملی نغمہ ’’پاکستان‘‘ جاری

ملی نغمے میں پیغام دیا گیا کہ پاکستان امن کا خواہاں ہے لیکن اگر وطن پر آنچ آئی تو قوم خاموش نہیں بیٹھے گی

جمعرات 26 جون 2025 15:35

’لاالٰہ الاللہ‘ کی صداؤں کیساتھ وطن پر قربانی کا عہد،نیا ملی نغمہ ..

راولپنڈی(اُردو پوائنٹ اخبارتازہ ترین - این این آئی۔ 26 جون2025ء)آئی ایس پی آر نے ’لاالٰہ الاللہ‘ کی صداؤں کے ساتھ وطن پر قربانی کے عہد کا اظہار کرتا نیا ملی نغمہ ’’پاکستان‘‘ جاری کردیا۔آئی ایس پی آر نے قومی اتحاد، حب الوطنی اور دفاعی عزم پر مبنی خصوصی ملی نغمہ ’’پاکستان‘‘جاری کر دیا، جو پوری قوم کے جذبات اور نظریاتی وحدت کی عکاسی کرتا ہے۔

نئے ملی نغمے میں واضح پیغام دیا گیا کہ وطن عزیز صرف ایک سرزمین نہیں بلکہ ایک ایسا نظریہ ہے جو اسلام اور اس کی اقدار پر قائم ہے۔یہ ملی نغمہ نہ صرف وطن سے محبت، قربانی اور اتحاد کی گونج ہے بلکہ اس میں دشمن کو دو ٹوک پیغام بھی دیا گیا ہے کہ پاکستانی قوم ہر خطرے کے سامنے سیسہ پلائی دیوار بن کر کھڑی رہے گی۔ نغمے کا مرکزی مصرع ’’لا الٰہ الاللہ ہر دًم اٹھتی آواز ہے پاکستان سے‘‘قوم کی روحانی وابستگی اور نظریاتی پہچان کا مظہر ہے۔

(جاری ہے)

آئی ایس پی آر کے اس نغمے میں ملک کے تمام صوبوں اور قومیتوں،پشتون، سندھی، بلوچ، پنجابی، گلگتی اور کشمیری کو ایک پرچم تلے متحد دکھایا گیا ہے، جو قومی یکجہتی اور ہم آہنگی کی خوبصورت تصویر پیش کرتا ہے۔ نغمے میں بہادری، جرآت اور وطن سے غیر متزلزل وابستگی کی لازوال کہانی بیان کی گئی ہے۔ملی نغمے میں پیغام دیا گیا کہ پاکستان امن کا خواہاں ضرور ہے، لیکن اگر وطن پر آنچ آئی تو قوم خاموش نہیں بیٹھے گی۔ ’’پاکستان‘‘ کے نام سے جاری یہ نغمہ ملکی دفاع، نظریاتی سرحدوں اور قومی وحدت کے عزم کی بھرپور ترجمانی ہے، جو ہر پاکستانی کے دل کی آواز بن چکا ہے۔