اللہ والا ٹرسٹ کے چیئرمین شاہد لون کی سالگرہ، یتیم بچوں کے ساتھ سویٹ ہوم میں خوشیوں بھری تقریب.جیو پاک ہسپتال میں سویٹ ہوم کے بچوں کا فری علاج معالجہ

شاہد نذیر چوہدری جمعرات 26 جون 2025 18:11

لاہور (اُردو پوائنٹ اخبارتازہ ترین۔ 26 جون2025ء) معروف فلاحی ادارے اللہ والا ٹرسٹ کے چیئرمین شاہد لون کی سالگرہ حال ہی میں لاہور کے سویٹ ہوم میں ایک منفرد اور باوقار انداز میں منائی گئی، جہاں خوشیوں میں شریک ہونے کے لیے سویٹ ہوم کے زیرِکفالت یتیم بچے بھی موجود تھے۔ اس موقع پر بچوں کی بھی اجتماعی سالگرہ کا اہتمام کیا گیا، جس نے تقریب کو مزید پرمسرت بنا دیا۔

تقریب میں کئی نمایاں شخصیات نے شرکت کی، جن میں النور پراجیکٹ کے سی ای او امجد وٹو، پیپلز نیڈز ویلفیئر سوسائٹی کے چیئرمین اور اردو پوائنٹ کے گروپ ہیڈ آف ملٹی میڈیا شاہد نذیر چودھری، جیو پاک ہسپتال موہلنوال کے سی ای او عبدالشکور، ڈائریکٹر مارکیٹنگ ڈاکٹر ذیشان اور دیگر معزز مہمان شامل تھے۔

(جاری ہے)

تقریب کی میزبانی معروف سماجی شخصیت شیخ پرویز نے کی، جنہوں نے مہمانوں کا پرجوش خیرمقدم کیا اور اللہ والا ٹرسٹ کی جانب سے بچوں کی تعلیم، تربیت، خوراک اور نگہداشت کے حوالے سے کی جانے والی کاوشوں پر اظہارِ تشکر کیا۔

اللہ والا ٹرسٹ کے میڈیا ڈائریکٹر رانا حسن افضل نے اس موقع پر بتایا کہ سویٹ ہوم کا انتظام بیت المال کے تعاون سے چلایا جا رہا ہے اور ادارہ یتیم بچوں کے معیارِ زندگی کو بہتر بنانے کے لیے مسلسل کوشاں ہے۔

تقریب میں خطاب کرتے ہوئے چیئرمین شاہد لون نے اعلان کیا کہ اللہ والا ٹرسٹ جلد ہی ملک بھر میں دو لاکھ سکول کے بچوں کو مفت کھانے کی سہولت فراہم کرنے والا پہلا ادارہ بن جائے گا۔

اُن کا کہنا تھا کہ اسکولوں میں بچوں کو مفت خوراک کی فراہمی کے منصوبے کو یونیسف اور دیگر عالمی ادارے بھی سراہ رہے ہیں۔ اللہ والا ٹرسٹ پاکستان میں سکولوں کوفری فوڈ مہیا کرنے والا پہلا ادارہ ہے ۔
اس موقع پر شاہد نذیر چودھری نے اعلان کیا کہ جیو پاک ہسپتال سویٹ ہوم کے تمام بچوں کو مفت علاج کی سہولت دے گا، اور ہر پندرہ روز بعد ہسپتال کے ماہر ڈاکٹرز خود سویٹ ہوم آ کر بچوں کا چیک اپ کیا کریں گے۔
اختتام پر جیو پاک کے سی ای او عبدالشکور نے سویٹ ہوم کا وزٹ کیا اور اعلان کیا کہ پیپلز نیڈز ویلفیئر سوسائٹی سویٹ ہوم کے بچوں کو چینی زبان سکھانے کے لیے مفت تربیت و سہولیات فراہم کرے گی، تاکہ وہ مستقبل میں بہتر تعلیمی اور پیشہ ورانہ مواقع سے فائدہ اٹھا سکیں۔