کرسٹیانو رونالڈو کا سعودی عرب کے فٹ بال کلب کے ساتھ نیا معاہدہ، یومیہ تنخواہ کروڑوں روپے ہوگی

رونالڈو سعودی کلب النصر میں اب تک 105 میچوں میں مجموعی طور پر 93 گول کر چکے ہیں

ذیشان مہتاب جمعہ 27 جون 2025 12:18

کرسٹیانو رونالڈو کا سعودی عرب کے فٹ بال کلب کے ساتھ نیا معاہدہ، یومیہ ..

ریاض (اردو پوائنٹ تازہ ترین اخبار ۔ 27 جون 2025ء ) پرتگال سے تعلق رکھنے والے دنیا کے مشہور فٹ بالر کرسٹیانو رونالڈو نے سعودی عرب کے کلب النصر کے ساتھ مزید دو سال کا نیا معاہدہ کرلیا، جس کے بعد ان کی کلب چھوڑنے کی افواہیں دم توڑ گئی ہیں۔

سماجی رابطے کی ویب سائٹ ایکس پر کرسٹیانو رونالڈو نے کلب کے چیئرمین عبداللہ الماجد کے ساتھ تصویر جاری کی اور پیغام میں کہا کہ نیا باب شروع ہوگیا، وہی جذبہ، وہی ارادے، مل کر تاریخ رقم کریں۔

رونالڈو نے النصر کے چیئرمین کے ساتھ جاری تصویر میں اپنی جرسی بھی لی ہوئی ہے، جس میں رونالڈو 2027ء لکھا ہوا ہے۔

A new chapter begins. Same passion, same dream. Let’s make history together. 🟡🔵 pic.twitter.com/JRwwjEcSZR
— Cristiano Ronaldo (@Cristiano) June 26, 2025

النصر نے اپنے بیان میں کہا کہ کرسٹیانو رونالڈو نے معاہدے میں دو سال کی توسیع پر دستخط کرلیے ہیں۔

(جاری ہے)

Cristiano Ronaldo is staying at @AlNassrFC until 2027 💛🤩 pic.twitter.com/uVOzvZW4u7
— AlNassr FC (@AlNassrFC_EN) June 26, 2025

سوشل میڈیا پر جاری بیان میں کہا گیا کہ النصر کے چیئرمین عبداللہ الماجد نے کلب کی طرف سے معاہدے پر دستخط کیے اور یہ معاہدہ 2027ء تک ہوگا۔

رونالڈو اس معاہدے کے مطابق اپنی 42 ویں سالگرہ بھی النصر میں منائیں گے اور پہلے ہی کہا جا رہا ہے کہ وہ 2026ء کے ورلڈ کپ میں پرتگال کی نمائندگی کریں گے۔

یاد رہے کہ کرسٹیانو رونالڈو نے 2022ء میں سعودی عرب کے فٹ بال کلب النصر سے معاہدہ کیا تھا اور اب تک 105 میچوں میں مجموعی طور پر 93 گول کر چکے ہیں۔

غیر ملکی میڈیا رپورٹس کے مطابق معاہدے کے تحت رونالڈو کو سالانہ 188 ملین یورو یعنی تقریباً 61 ارب 50 کروڑ پاکستانی روپے ملیں گے۔

میڈیا رپورٹس میں بتایا گیا ہے کہ رونالڈو کی ایک دن کی تنخواہ 16 کروڑ 84 لاکھ روپے ہوگی۔

رونالڈو اس سے قبل انگلینڈ کے فٹ بال کلب مانچسٹر یونائیٹڈ کے لیے کھیل رہے تھے تاہم وہاں اپنا دوسری مدت چھوڑ کر سعودی کلب میں شمولیت کی تھی۔

40 سالہ کرسٹیانو رونالڈو اپنے کیریئر کے ایک ہزار گول کی طرف گامزن ہیں اور اب تک انہوں نے مختلف کلبز اور اپنے ملک کے لیے مجموعی طور پر 938 گول کر رکھے ہیں۔

ان کی قیادت میں پرتگال نے حال ہی میں یوئیفا نیشنز لیگ کا ٹائٹل دوسری مرتبہ حاصل کیا، اس سے قبل پرتگال کو یورپ کا چیمپئن بھی بنوایا تھا۔