ڈاکٹر بشیر عاصم کی شعری تصنیف ''دل محبت کا استعارہ ہی'' کی شاندار تقریبِ رونمائی

کراچی (اُردو پوائنٹ اخبارتازہ ترین - این این آئی۔ 27 جون2025ء)لندن کے علاقے الفرڈ میں واقع تاریخی سینٹ اینڈریوز چرچ ہال میں اردو ادب اور بین المذاہب ہم آہنگی کے فروغ کی ایک یادگار تقریب منعقد ہوئی، جس میں معروف مسیحی رہنما، شاعر، اور ادیب ڈاکٹر بشیر عاصم کے پہلے شعری مجموعے ''دل محبت کا استعارہ ہی'' کی تقریبِ رونمائی منعقد کی گئی۔تقریب کا باقاعدہ آغاز ریورنڈ ریاض مبارک کی دعا سے ہوا، جس میں انہوں نے کتاب کے خالق اور تمام حاضرین کے لیے دعائے خیر کی۔

اس پُرمسرت ادبی تقریب کے مہمانِ خصوصی ممتاز دانشور ڈاکٹر پیٹر جے ڈیوڈ تھے، جنہوں نے اپنی تقریر میں بشیر عاصم کے ادبی ذوق اور مذہبی ہم آہنگی کی کاوشوں کو خراجِ تحسین پیش کیا۔کتاب پر تفصیلی تبصرے اور تنقیدی آراء محترمہ نیلما ناہید درانی اور ممتاز ادیب یشب تمنا نے پیش کیں۔

(جاری ہے)

دونوں مقررین نے ڈاکٹر بشیر عاصم کے اس شعری مجموعے کو نہ صرف ادبی معیار کا آئینہ دار بلکہ محبت، امن، اور روحانیت کا ترجمان قرار دیا۔

مزید براں ریورنڈ رانا یوآب خان اور پادری تصور سیموئیل نے بھی کتاب کے مختلف اشعار اور مضامین پر گفتگو کرتے ہوئے بشیر عاصم کی شاعری کو ایک مخلص اور بین المذاہب مکالمے کی روشن مثال قرار دیا۔ انہوں نے کہا کہ ڈاکٹر بشیر ایک ایسے شاعر ہیں جو نہ صرف الفاظ سے دلوں کو جوڑتے ہیں بلکہ اپنی عملی زندگی میں بھی محبت، برداشت، اور ہم آہنگی کی تعلیم دیتے ہیں۔

تقریبِ رونمائی کے بعد ایک خوبصورت مشاعرے کا اہتمام کیا گیا، جس کی نظامت ممتاز مذہبی و ادبی شخصیت پادری سلامت بریعہ زندانی نے نہایت خوبصورت انداز میں انجام دی جبکہ صدارت محترمہ نیلما ناہید درانی نے فرمائی۔ اس مشاعرے میں معروف شعرا نے شرکت کی جن میں عاصم نسیم، پادری تصور سیموئیل، انجم شہزاد، سلیم فگار، شہباز خواجہ شامل تھے۔ مشاعرے کے مہمانِ اعزاز یشب تمنا تھے، جنہوں نے اپنے مخصوص انداز میں کلام سنا کر حاضرین کو مسحور کر دیا۔

پروگرام کے اختتام پر شرکاء کی تواضع پرتکلف عشائیے سے کی گئی۔ آخر میں ڈاکٹر بشیر عاصم نے تمام مہمانوں اور شعرا حضرات کا شکریہ ادا کیا اور اپنی کتاب ''دل محبت کا استعارہ ہی'' کی اعزازی کاپیاں بطور تحفہ پیش کیں۔یہ تقریب نہ صرف ایک ادبی جشن تھی بلکہ بین المذاہب محبت، امن، اور یگانگت کے پیغام کی حامل ایک تاریخی ادبی روایت بھی بن گئی۔جناب قیصر افرائم سرویا (سابق ایم پی ای) بشیر عاصم کی کتاب رونمائی میں خصوصی طور پر شر یک ہوئے اور اپنے زریں خیالات کا اظہار کیا۔دل محبت کا استعارہ ہے کتاب کو شاعری کی معیاری قرار دیا۔قیصر افرائیم سرویا صاحب کا تعلق ملتان سے ہے، ایک سوشل ورکر اور سیاست دان ہیں، دو مرتبہ صوبائی اسمبلی پنجاب کے رکن رہے چکے ہیں۔