مسلمان کی دل آزاری اچھا عمل نہیں،گناہ ہے، علامہ الیاس قادری

سوشل میڈیا کیلئے گناہ بھری ویڈیو بنانے اور شیئر کرنے والے اللہ کی بارگاہ میں توبہ کریں، امیر اہلسنت

جمعہ 27 جون 2025 22:47

کراچی (اُردو پوائنٹ اخبارتازہ ترین - این این آئی۔ 27 جون2025ء) امیر اہل سنت علامہ محمد الیاس عطار قادری نے کہا کہ سیدناحضرت عمر فاروق اعظم رضی اللہ عنہ روزانہ کی بنیاد پر اپنا محاسبہ کیا کرتے تھے، یہاں ہمیں ایک دن کا بھی یاد نہیں رہتا تو ہم سال بھر کے گناہوں کو کس طرح یاد رکھیں گے، جب بھی گناہ ہوجائے تو فوری توبہ کرنا واجب ہے کیونکہ اس میں تاخیر خود ایک گناہ ہے۔

ان خیالات کا اظہار انہوں نے یکم محرم الحرام سے عالمی مدنی مرکز فیضان مدینہ کراچی میں شروع ہونے والے مدنی مذاکرے میں گفتگو کرتے ہوئے کیا، ان مدنی مذاکرے میں کراچی کے علاوہ فیصل آباد،ٹوبہ ٹیک سنگھ، چنیوٹ، ملتان، خانیوال، لودھراں، وہاڑی، پیر محل، کمالیہ، جڑانوالہ و دیگر علاقوں سے آئے عاشقان رسول شریک ہوئے۔

(جاری ہے)

امیر اہل سنت نے کہا کہ بزرگان دین کی سیرت سے کئی ایسے واقعات ملتے ہیں کہ اگر ان سے بچپن میں بھی کوئی خطاسرزد ہوگئی ہو تو اسے بھی یاد رکھتے اور اس پر رنجیدہ و افسردہ رہتے تھے، لہٰذا ہمیں چاہئے کہ گزشتہ سال سرزد ہونے والی اپنی غطاؤں کو یاد رکھ کر ان سے توبہ و استغفار کی جائے اور رہ جانے والے نیک اعمال نئے اسلامی سال کرنے کیلئے پختہ ارادہ کریں۔

امیر اہل سنت نے کہا کہ کسی بھی مسلمان کی دل آزاری اچھا عمل نہیں بلکہ گناہ کاکام ہے اور اس سے بچنا بہت ضروری ہے، آج کل پیسہ کمانے کیلئے سوشل میڈیا کیلئے گناہ بھری ایسی ویڈیوز بنائی جارہی ہیں جس میں آپس میں ہی کچھ افراد اس طرح کی حرکتیں کرتے ہیں جسے دیکھ کر لوگ مزہ لیں اور کئی نادان تواس ویڈیو کو آگے وائرل بھی کرتے ہیں جس سے ویڈیو بنانے اور مزید آگے بھیجنے والے اپنے لئے گناہوں کا سامان جمع کررہے ہیں،یاد رکھیں ایک مسلمان کو بھی اس چیز کی اجازت نہیں کہ وہ اپنی عزت خراب کرے، لہٰذا وہ تمام لوگ جو اس طرح کے کاموں میں ملوث ہیں انہیں چاہئے کہ اپنی جان پر رحم کھاکر اللہ کی بارگاہ میں فوری توبہ کریں۔

امیر اہل سنت نے مدنی مذاکرے کے دوران عاشقان رسول کو محرم الحرام میں زیادہ سے زیادہ تلاوت قرآن کرنے کے ساتھ ساتھ کثرت سے روزہ رکھنے کی ترغیب دی، آخر میں دعائے خیر کی گئی۔