ھ*آئی جی پنجاب کی پولیس ملازمین و اہلخانہ سے ملاقات، متعدد درخواستوں پر فوری احکامات

ٌسکالرشپ، پروموشن، تبادلے اور کلیم سمیت مختلف درخواستوں پر متعلقہ افسران کو ریلیف کی ہدایات

جمعہ 27 جون 2025 20:20

S لاہور (اُردو پوائنٹ اخبارتازہ ترین - آن لائن۔ 27 جون2025ء)آئی جی پنجاب ڈاکٹر عثمان انور نے سنٹرل پولیس آفس میں پولیس ملازمین اور ان کے اہلخانہ سے ملاقات کی، جس دوران انہوں نے پولیس اہلکاروں کے مسائل خود سنے اور فوری ریلیف کے لیے احکامات جاری کیے۔ترجمان پنجاب پولیس کے مطابق اے ایس آئی محمد فیاض کی بیٹے کی اسکالرشپ اور مالی امداد کی درخواست پر ڈی آئی جی ویلفیئر کو کارروائی کی ہدایت کی گئی، جب کہ شہید کانسٹیبل امیر محمد کے بھائی کی پینشن کی ادائیگی کی درخواست پر آر پی او فیصل آباد کو ریلیف کی ہدایت دی گئی۔

ہیڈ کانسٹیبل حیدر علی کی پروموشن اور مالی معاونت، ڈرائیور کانسٹیبل شہزاد احمد کی انفرادی درخواست، ہیڈ کانسٹیبل محمد تنویر رضا کی والدہ کی جانب سے تبادلے کی درخواست، اور شہید کانسٹیبل شیر علی کی والدہ کی شہید کلیم پر بھرتی سے متعلق درخواست پر بھی متعلقہ افسران کو ریلیف کیلئے احکامات جاری کیے گئے۔

(جاری ہے)

اس کے علاوہ آٹھ انسپکٹرز کی سروس ریگولرائزیشن کی درخواست پر ایڈیشنل آئی جی پنجاب کو ضروری کارروائی کی ہدایت کی گئی، جبکہ ڈسپلن، ایڈمن، پروموشن اور ویلفیئر سے متعلقہ دیگر امور پر بھی آئی جی پنجاب نے احکامات جاری کیے۔

ڈاکٹر عثمان انور نے کہا کہ پولیس فورس کے مسائل کا بروقت حل اور شہداء کے خاندانوں کی داد رسی ان کی اولین ترجیح ہے، اور تمام متعلقہ افسران کو ہدایت کی گئی ہے کہ ریلیف کی فراہمی میں کسی قسم کی تاخیر نہ کی جائے۔