پنجاب کے سرکاری ہسپتالوں میں صحت کارڈ کی مفت سہولت بند کرنے کا فیصلہ ، مراسلہ جاری

سرکاری ہسپتالوں کے سربراہان کوجاری کئے گئے مراسلے میں کہا گیا ہے کہ 30 جون 2025 کے بعد لاہور سمیت صوبے بھر کے تمام سرکاری ہسپتالوں میں صحت کارڈ پر علاج کی سہولت ختم کر دی جائے گی

فیصل علوی ہفتہ 28 جون 2025 14:45

پنجاب کے سرکاری ہسپتالوں میں صحت کارڈ کی مفت سہولت بند کرنے کا فیصلہ ..

لاہور(اردوپوائنٹ اخبار تازہ ترین۔28جون 2025)پنجاب حکومت نے صوبے بھر کے سرکاری ہسپتالوں میں صحت کارڈ کی مفت سہولت بند کرنے کا فیصلہ کرلیا، پنجاب ہیلتھ انیشیٹو مینجمنٹ کمپنی کی جانب سے تمام سرکاری ہسپتالوں کے سربراہان کو باقاعدہ مراسلہ جاری کر دیا گیا،پنجاب حکومت نے فیصلہ کیا ہے کہ 30 جون 2025 کے بعد لاہور سمیت صوبے بھر کے تمام سرکاری ہسپتالوں میں صحت کارڈ پر علاج کی سہولت ختم کر دی جائے گی۔

مراسلے کے مطابق تمام ہسپتالوں کو ہدایت دی گئی ہے کہ وہ 30 جون سے قبل صحت کارڈ کے تحت کئے گئے علاج کے تمام واجبات کلیئر کر لیں کیونکہ اس تاریخ کے بعد صحت کارڈ کی سہولت ختم ہو جائے گی۔مراسلے میں یہ بھی کہاگیا ہے کہ 30 جون 2025 کے بعد صحت کارڈ کے ذریعے علاج کی سہولت دستیاب نہیں ہو گی۔

(جاری ہے)

پنجاب ہیلتھ انیشیٹو مینجمنٹ کمپنی کی جانب سے جاری کردہ مراسلے میں کہاگیا ہے کہ وزیراعلیٰ پنجاب فری علاج کیلئے جلد نئی پالیسی متعارف کروائیں گی۔

اس فیصلے کے بعد اب شہریوں کو صحت کارڈ کے ذریعے مفت علاج کی سہولت حاصل نہیں ہوگی اور انہیں علاج کیلئے خود پیسے خرچ کرنے ہوں گے۔یہ بھی بتایاگیا ہے کہ صحت کارڈاب صرف نجی ہسپتالوں میں قابل استعمال ہو گا۔ مریضوں کو نجی ہسپتالوں میں 50 فیصد بل اپنی جیب سے ادا کرنا ہو گا۔ نجی ہسپتالوں میں صحت کارڈ کے تحت گائنی اور آنکھوں کے آپریشن کی سہولت دستیاب نہیں ہو گی جبکہ جنرل سرجریز، دل کے علاج، ڈائیلیسز اور دیگر مخصوص بیماریوں کا علاج ممکن ہو گا۔

یاد رہے کہ پاکستان تحریک انصاف کے پچھلے دور حکومت میں صحت کارڈ منصوبے کا آغاز کیا گیا تھاجس کے تحت غریب افراد کو سرکاری و پرائیویٹ ہسپتالوں میں مفت علاج کی سہولت فراہم کی گئی تھی۔صحت کارڈ کے تحت10لاکھ تک سالانہ علاج کی سہولیات فراہم کی گئیں تھیں۔ صحت کارڈ کے ذریعے کم آمدن والے افراد کو سرکاری و پرائیویٹ ہسپتالوں سے مہلک بیماریوں کے علاج کی سہولیات فراہم کی گئیں تھیں۔