مہنگائی کا طوفان بے قابو، برائلر گوشت سمیت سبزی و پھل عام آدمی کی پہنچ سے باہر

برائلر گوشت 417 روپے، انڈے 244، سیب 600 اور آلو 110 روپے فی کلو فروخت ہو رہے ہیں، عوام اشیائے ضروریہ خریدنے سے بھی قاصر، حکومتی قیمت کنٹرول دعوے زبانی دعوؤں تک محدود

ہفتہ 28 جون 2025 19:25

مہنگائی کا طوفان بے قابو، برائلر گوشت سمیت سبزی و پھل عام آدمی کی پہنچ ..

لاہور (اُردو پوائنٹ اخبارتازہ ترین - آن لائن۔ 28 جون2025ء)ملک میں مہنگائی نے عوام کی کمر توڑ کر رکھ دی ہے، روزمرہ اشیائے خورونوش کی قیمتیں مسلسل بلند ترین سطح پر جا رہی ہیں۔ حکومتی دعوے غیر مؤثر ہو چکے ہیں جبکہ مارکیٹ میں مہنگائی مافیا کھلے عام من مانیاں کرتا دکھائی دے رہا ہے۔تازہ ترین اطلاعات کے مطابق برائلر گوشت کی قیمت ایک بار پھر 14 روپے اضافے کے ساتھ 417 روپے فی کلو تک جا پہنچی ہے، جبکہ فارمی انڈے 244 روپے فی درجن میں فروخت ہو رہے ہیں۔

ہول سیل مارکیٹ میں انڈوں کی پیٹی 7200 روپے میں دستیاب ہے۔

(جاری ہے)

سبزیوں کی قیمتیں بھی آسمان سے باتیں کرنے لگی ہیں۔ لاہور کی مارکیٹ میں میتھی 160 روپے، کریلے 120 روپے، آلو 110 روپے، اور بینگن 100 روپے فی کلو کے حساب سے فروخت ہو رہے ہیں۔پھلوں کی قیمتیں بھی عوام کی پہنچ سے باہر ہوتی جا رہی ہیں، سیب 600 روپے، پپیتا 550 روپے، فالسہ 350 روپے، اور سندھڑی آم 270 روپے فی کلو کے حساب سے دستیاب ہیں۔شہریوں کا کہنا ہے کہ حکومت قیمتوں کو کنٹرول کرنے میں مکمل طور پر ناکام ہو چکی ہے، صرف بیانات دیے جا رہے ہیں مگر عملی اقدامات کا فقدان ہے۔ مہنگائی کا یہ طوفان رکنے کا نام نہیں لے رہا اور غریب آدمی کے لیے دو وقت کی روٹی کا حصول بھی دن بہ دن دشوار ہوتا جا رہا ہے۔