جموں کشمیر عوامی جائنٹ ایکشن کمیٹی کے سامنے ایک بار پھر حکومت آزاد کشمیر کی جانب سے صبر و تحمل کی شاندار مثال

مظفرآباد(اُردو پوائنٹ اخبارتازہ ترین - این این آئی۔ 29 جون2025ء) جموں کشمیر عوامی جائنٹ ایکشن کمیٹی کے سامنے ایک بار پھر حکومت آزاد کشمیر کی جانب سے صبر و تحمل کی شاندار مثال۔ جموں کشمیر عوامی جائنٹ ایکشن کمیٹی کے تمام مطالبات منظور نوٹیفکیشن جاری۔ عوام میں ملے جلے تاثرات، اکثریت نے حکومت کی جانب سے جموں کشمیر عوامی جائنٹ ایکشن کمیٹی کے مطالبات کو منظور کرنے پر خوشی کا اظہار کیا جبکہ چند ایک نے جموں کشمیر عوامی جائنٹ ایکشن کمیٹی کے مطالبات کے کئی ایک نکات کو غیر اصولی قرار دیا۔

تفصیلات کے مطابق گزشتہ روز حکومت آزاد کشمیر نے جموں کشمیر عوامی جائنٹ ایکشن کمیٹی کے کور ممبران سے گفت و شنید کے بعد ان کے تمام تر مطالبات کو تسلیم کرتے ہوئے ان مطالبات پر نوٹیفکیشن بھی جاری کر دیے۔

(جاری ہے)

رات گئے مطالبات کی منظوری کے بعد جموں کشمیر عوامی جائینٹ ایکشن کمیٹی کے کور ممبر شوکت نواز میر نے گزشتہ روز ہونے والی احتجاج کی کال کو واپس لینے کا اعلان کیا۔

جس پر شہریوں نے ملے جلے تاثرات کا اظہار کیا، اکثر شہریوں کا کہنا تھا کہ ہم نے اپنے بچوں کی تعلیم کے لیے لاکھوں روپے جمع کروا رکھے تھے مگر احتجاج کی کال کی وجہ سے ان کا ایک دن ضائع ہو گیا، کیونکہ تیاری کروانے والی اکیڈمیوں نے بھی اکیڈمیاں بند کرنے کا نوٹیفکیشن جاری کر دیا تھا، جس پر بچوں کا قیمتی وقت ضائع ہوا۔ خاص کر ایم ڈی کیٹ، ای کیٹ کرنے والے طلبہ و طالبات نے شدید احتجاج کرتے ہوئے جموں کشمیر عوامی جائنٹ ایکشن کمیٹی کے زعماء سے کہا کہ وہ اثئے روز بلاوجہ احتجاج پہیہ جام شٹر ڈاؤن کی کال دے کر نہ صرف ریاست میں افرا تفری پھیلاتے ہیں، بلکہ حکومتی رٹ کو چیلنج کرنے سمیت نسل نو کا مستقبل تاریک بنا رہے ہیں۔

دوسری جانب حکومت نے انتہائی مدبرانہ اور دور اندیشانہ فیصلے کرتے ہوئے جموں کشمیر عوامی جائنٹ ایکشن کمیٹی کے تمام مطالبات کو تسلیم کرتے ہوئے نوٹیفکیشن بھی جاری کر دیے۔ جس کے مطابق مظفرآباد ڈویژن کی انتظامیہ سے معاملات طے پا گئے، 28 جون کی شٹر ڈاؤن ہڑتال کو موخر کر دیا گیا، جموں کشمیر جائنٹ عوامی ایکشن کمیٹی مظفرآباد ڈویژن اور ضلعی انتظامیہ کے درمیان جعلی ادویات کی چھان بین پر بھی معاہدہ طے پا گیا، انکوائری کمیشن کا نوٹیفکیشن جاری کر دیا گیا،اسی طرح جموں کشمیر جائنٹ عوامی ایکشن کمیٹی مظفرآباد ڈویژن اور ضلعی انتظامیہ کے درمیان لوہار گلی روڈ پر روزانہ کی بنیاد پر پانی کے چھڑکاؤ کا نوٹیفکیشن بھی جاری کر دیاگیا۔

آزاد حکومت ریاست جموں و کشمیر کی جانب سے عوام الناس کو زمین کی فروخت پر عائد ایجوکیشن سیس کے خاتمے کا نوٹیفکیشن بھی جاری، 20 ایام میں حتمی آرڈیننس بحال کر دیا جائے گا۔ جموں کشمیر جوائنٹ عوامی ایکشن کمیٹی مظفرآباد ڈویژن اور ضلعی انتظامیہ کے درمیان تصفیہ طلب بجلی کنکشن پر بھی معاہدہ طے پا گیا، جب تک معاملہ زیر کار ہے کوئی ڈسکنکشن نہیں ہوگی۔