نیشنل سینٹر آف ایکسیلنس ان جیالوجی کاموسم گرما کا پہلا پروفیشنل ٹریننگ پروگرام مکمل

پیر 30 جون 2025 16:50

پشاور (اُردو پوائنٹ اخبارتازہ ترین - اے پی پی۔ 30 جون2025ء) نیشنل سینٹر آف ایکسیلنس ان جیالوجی پشاور نے اپنے پہلے پروفیشنل ٹریننگ پروگرام موسم گرما 2025 کو کامیابی کے ساتھ مکمل کیا جس میں شرکاء میں سرٹیفکیٹس تقسیم کیے گئے۔یہ مہینہ بھر پر مشتمل ٹریننگ پروگرام "معدنیات کی تلاش کے لیے انٹیگریٹڈ جیو اسپیشل، جیو کیمیکل، اور جیو فزیکل ٹیکنیکس" کے عنوان سے یکم جون سے 30 جون 2025 تک منعقد کیا گیا تھا جس میں 25 شرکاء نے شرکت کی، جن میں طلباء اور ماہرین شامل تھے۔

اس پروگرام کا مقصد جیو سائنس کے گریجویٹس کی مہارتوں کو بڑھانا اور جدید تلاش کی تکنیکوں اور فیلڈ ورک کے ذریعے ان کی روزگار کی صلاحیتوں میں بہتری لانا تھا۔ٹریننگ کے دوران، شرکاء نے معدنیات کی تلاش کے لیے جیو اسپیشل، جیو کیمیکل اور جیو فزیکل طریقوں میں مہارت حاصل کی۔

(جاری ہے)

انہوں نے فیلڈ ورک بھی کیا اور خیبر پختونخوا کے فعال کان کنی کے مقامات کا دورہ کیا، جہاں انہیں حقیقی دنیا میں ان تکنیکوں کے عملی استعمال کا تجربہ حاصل ہوا۔

اس پروگرام کا انعقاد نیشنل سنٹرآف ایکسیلنس ان جیالوجی پشاور کے ماہر اساتذہ اور عملے نے کیا، جنہوں نے مرکز کی جدید لیبارٹریز اور فیلڈ سہولتوں کا استعمال کیا۔نیشنل سنٹرآف ایکسیلنس ان جیالوجی پشاور جیو سائنس کی تعلیم کو آگے بڑھانے اور معدنیات کی تلاش میں ماہر پیشہ ور افراد کو فروغ دینے کے لیے پرعزم ہے۔