نیتھن لیون نے آسٹریلوی ٹیم کے سانگ ماسٹر سے انوکھی ریٹائرمنٹ لے لی

منگل 1 جولائی 2025 13:55

سڈنی (اُردو پوائنٹ اخبارتازہ ترین - این این آئی۔ 01 جولائی2025ء)آسٹریلیا کے اسپنر نیتھن لیون نے انوکھی ریٹائرمنٹ لے لی، انہوں آسٹریلوی ٹیم کے سانگ ماسٹر سے ریٹائرمنٹ لے کر جانشین کی بھی نشاندہی کر دی۔نیتھن لیون آسٹریلیا کے وکٹری سونگ کو لیڈ کرتے تھے، انہوں نے آسٹریلیا کی ٹیسٹ کرکٹ ٹیم میں جشن کی قیادت کی ذمے داری چھوڑ دی۔نیتھن لیون کا ٹیسٹ کرکٹ سے ریٹائرمنٹ کا کوئی ارادہ نہیں ہے، انہوں نے جشن منانے کی قیادت ایلکس کیری کو سونپ دی۔

میچ جیتنے کے بعد آسٹریلوی ٹیم باقاعدہ ایک جشن کرتی ہے جس کی قیادت نیتھن لیون کر رہے تھے۔اس حوالے سے نیتھن لیون کا کہنا ہے کہ ٹیم کا گانا اور جشن لیڈ کرنا میرے لیے اعزاز کی بات رہی ہے، جشن کی ذمے داری سے سبکدوش ہونے کا مطلب یہ نہیں کہ میں کرکٹ سے ریٹائر ہو رہا ہوں۔

(جاری ہے)

انہوں نے کہا کہ میرے خیال میں ایلکس کیری ایک بہترین امیدوار ہیں، ارادہ تھا کہ اگر آسٹریلیا ورلڈ ٹیسٹ چیمپئن شپ جیتتا تو یہ ذمے داری کسی اور کو دیتا مگر اب ویسٹ انڈیز سیریز میں یہ فیصلہ کیا۔

ان کا کہنا تھا کہ میں نے ہمیشہ کہا ہے کہ میں بھارت اور انگلینڈ میں جیتنا چاہتا ہوں، ابھی ایک اور ورلڈ ٹیسٹ چیمپئن شپ کھیلنے کا ارادہ ہے۔ واضح رہے کہ نیتھن لیون 138 ٹیسٹ میچز میں آسٹریلیا کی نمائندگی کر چکے ہیں، انہوں نے وکٹری سونگ ماسٹر کا کردار 12 برس سے زائد نبھایا، انہوں نے یہ ذمے داری مائیک ہسی سے لی جنہوں نے 67 ٹیسٹ میچز میں لیڈ کیا تھا۔