ہمیں ہر عمر کی خواتین کو مرکزی کرداروں میں دکھانا چاہئے، مہوش حیات

منگل 1 جولائی 2025 17:11

لاہور (اُردو پوائنٹ اخبارتازہ ترین - این این آئی۔ 01 جولائی2025ء) اداکارہ مہوش حیات نے کہا ہے کہ ہر عمر کی خواتین کو مرکزی کرداروں میں دکھانا چاہیے۔مہوش حیات نے حال ہی میں ایک ویب شو میں بطور مہمان شرکت کی جہاں ان سے یہ سوال پوچھا گیا کہ کیا ہماری شوبز انڈسٹری میں خواتین مردوں کے مقابلے عمر پرستی کا زیادہ شکار ہیں انہوں نے کہا بالکل، ہماری انڈسٹری میں بڑی عمر کے آدمی کو ایک چھوٹی عمر کی لڑکی کے ساتھ بطور ہیرو دکھانا بہت اچھا سمجھا جاتا ہے لیکن خواتین کے تناظر میں اسے اچھا نہیں سمجھا جاتا، یعنی خواتین اگر بطور ہیروئن نظر آنا چاہتی ہیں تو ان کی عمر کو تھم جانا چاہیے۔

اداکارہ نے کہا کہ یہ رجحان صرف یہاں پر ہی نظر آتا ہے مغربی دنیا میں ایسا کچھ نہیں ہے۔

(جاری ہے)

انہوں نے کہا کہ مجھے سمجھ نہیں آتی کہ ہم نے لوگ عورت کی عمر کے بارے میں حد کیوں مقرر کردی ہی یہاں تک کہ ہم عورت کے کام اور محنت کو بھی اس کی بڑھتی عمر دیکھ کر نظر انداز کر دیتے ہیں جو غلط ہے، ایسا بالکل نہیں ہونا چاہیے۔مہوش حیات نے کہا کہ ہر انسان کی عمر بڑھتی ہے تو عورت کیلیے عمر کی حد مقرر کرنا غیر منصفانہ سلوک ہے اور یہ ہماری انڈسٹری میں ہی نظر آتا ہے یہاں تک کہ بالی ووڈ میں بھی ایسا نہیں ہے، ان کی اتنی ساری بڑی عمر کی اداکارائیں اسکرین پر نظر آ رہی ہیں اور وہ لوگ انہیں سراہتے ہیں۔

انہوں نے کہا کہ ہمیں اس سوچ کو بدلنا ہوگا، ہمیں اس طرح کی کہانیاں اسکرین پر دکھانی ہوں گی جن میں تمام عمر کی خواتین کو مرکزی کردار ادا کرتے دکھایا جائے، خواتین کو سراہنے اور ان کی حوصلہ افزائی کرنے کا واحد طریقہ یہی ہے۔اداکارہ نے کہا کہ ہمیں عورت کی بڑھتی عمر کو قبول کرنا چاہیے اور جس طرح بڑھتی عمر کے ساتھ سمجھدار ہوتا ہے اور اس کے کام میں مزید نکھار آتا ہے بالکل اسی طرح عورت بھی بڑھتی عمر کے ساتھ سمجھدار ہوتی ہے اور اس کے کام میں نکھار آتا ہے۔