Live Updates

راولپنڈی میں حالیہ مون سون بارشوں کے پیش نظر رین ایمرجنسی نافذ ، تمام عملے کی چھٹیاں منسوخ

منگل 1 جولائی 2025 23:04

راولپنڈی (اُردو پوائنٹ اخبارتازہ ترین - اے پی پی۔ 01 جولائی2025ء) ایم ڈی واسا راولپنڈی محمد سلیم اشرف نے کہا ہے کہ حالیہ مون سون بارشوں کے پیش نظر واسا ہائی الرٹ ہے اور رین ایمرجنسی نافذ کرکے تمام عملے کی چھٹیاں منسوخ کر دی گئی ہیں جبکہ عملہ و ہیوی مشینری فیلڈ میں موجود ہے۔ جڑواں شہر راولپنڈی اسلام آباد میں گزشتہ رات موسلا دھار بارش ہوئی ، واسا راولپنڈی کی طرف سے بروقت ڈریجنگ اور ڈی سلٹنگ کی وجہ سے نالہ لئی میں سیلابی ریلہ بخیر خوبی گزر گیا۔

تفصیلات کے مطابق گزشتہ رات ہونے والی موسلا دھار بارش میں سید پور ویلج 30 ملی میٹر، گولڑہ 39 ملی میٹر ، بوکرا 25 ملی میٹر ، شمس آباد 70 ملی میٹر، کچہری 38 ملی میٹر ، پیرودہائی 54 ملی میٹر جبکہ ایک گھنٹے میں سیکٹر ایچ 8 میں 55 ملی میٹر اور شمس آباد میں 50 ملی میٹر بارش ہوئی جس کی بنیادی وجہ cloud brust تھی۔

(جاری ہے)

نالہ لئی میں پانی کی سطح کٹاریاں کے مقام پر 15 فٹ جبکہ گوالمنڈی کے مقام پر 15.5 فٹ بلند ہوئی ۔

ترجمان واسا کے مطابق واسا راولپنڈی محکمہ موسمیات کی پیش گوئی کی وجہ سے پہلے ہی ہائی الرٹ تھا بارش ہوتے ہی واسا راولپنڈی نے فوری طور پر رین ایمرجنسی نافذ کر دی اور مینجنگ ڈائریکٹر واسا راولپنڈی محمد سلیم اشرف فوری عملے کے ہمراہ فیلڈ میں پہنچ گئے اور تمام تر آپریشن کی ذاتی نگرانی کی ۔ اس دوران وزیر ہاؤسنگ پنجاب بلال یاسین ، سیکرٹری ہاؤسنگ پنجاب نور الامین مینگل اور ڈپٹی کمشنر راولپنڈی ڈاکٹر حسن وقار چیمہ مسلسل ایم ڈی واسا راولپنڈی سے رابطے میں رہے اور ایم ڈی واسا راولپنڈی ان کے لمحہ بہ لمحہ صورتحال سے آگاہ کرتے رہے ۔

ڈپٹی کمشنر راولپنڈی حسن وقار چیمہ نے کہا ہے کہ راولپنڈی شہر میں مون سون کے دوران دفعہ 144 کا نفاذ کیا گیا ہے خلاف ورزی پر سخت قانونی کاروائی عمل میں لائی جائے گی۔