دورہ بنگلادیش سے قبل قومی ٹیم فٹنس مسائل کا شکار

نائب کپتان شاداب خان، فاسٹ بولرز نسیم شاہ، وسیم جونیئر مکمل فِٹ نہیں، بائیں ہاتھ کے تیز بولر سلمان مرزا اورسفیان مقیم کی شمولیت متوقع

ذیشان مہتاب بدھ 2 جولائی 2025 12:31

دورہ بنگلادیش سے قبل قومی ٹیم فٹنس مسائل کا شکار

لاہور (اردو پوائنٹ تازہ ترین اخبار ۔ 2 جولائی 2025ء ) دورۂ بنگلا دیش سے قبل قومی کرکٹ ٹیم کو فٹنس مسائل نے گھیر لیا۔

ذرائع کے مطابق قومی کرکٹ ٹیم کے آل راؤنڈر شاداب خان دائیں کندھے کی تکلیف میں مبتلا ہیں ۔

ذرائع کا کہنا ہے کہ ڈاکٹرز نے شاداب کو کندھے کی تکلیف کے سبب سرجری تجویز کی ہے جس کے بعد انگلینڈ میں شاداب کی کندھے کی سرجری کا امکان ہے۔

ذرائع کا بتانا ہے کہ سرجری کے بعد شاداب تقریباً 3 ماہ تک کرکٹ سے آؤٹ ہوسکتے ہیں۔

(جاری ہے)

ذرائع کے مطابق شاداب کے علاوہ فاسٹ بولرز نسیم شاہ اور محمد وسیم جونیئر بھی مکمل طور پر فٹ نہیں ہیں اور آئندہ سیریز کے لیے ان کی دستیابی مشکوک ہے۔

ذرائع کا کہنا ہے کہ بنگلادیش کے خلاف ٹی ٹونٹی سیریز کیلئے قومی ٹیم میں لاہور قلندرز کے بائیں ہاتھ کے تیز بولر سلمان مرزا اور لیفٹ آرم اسپنر سفیان مقیم کی شمولیت کا امکان ہے۔

واضح رہے کہ دورۂ بنگلا دیش کے لیے قومی کرکٹ ٹیم کا کیمپ 8 جولائی سے نیشنل اسٹیڈیم کراچی میں لگے گا۔ قومی کرکٹ ٹیم 16 جولائی کو بنگلا دیش روانہ ہوگی۔

دونوں ٹیموں کے درمیان 3 ٹی ٹوئنٹی میچوں کی سیریز 20 جولائی سے شروع ہوگی ۔