Live Updates

قطر کی خود مختاری اور سلامتی کو خطرے میں ڈالنے کی ہر کوشش مسترد

عالمی برادری اسرائیلی حملوں کے تباہ کن اثرات کوروکے،سعودی کابینہ کااجلاس

بدھ 2 جولائی 2025 18:31

جدہ(اُردو پوائنٹ اخبارتازہ ترین - این این آئی۔ 02 جولائی2025ء)جدہ میں سعودی کابینہ کا اجلاس ولی عہد شہزادہ محمد بن سلمان کی صدارت میں منعقد ہوا۔اجلاس میں قطر سے یکجہتی کا بھرپور اظہار کیا گیا۔ کابینہ نے قطر کی خود مختاری، سلامتی اور استحکام کے مکمل تحفظ کی حمایت کی اور کسی بھی مداخلت یا خطرے کو مسترد کیا۔کابینہ نے عالمی برادری سے مطالبہ کیا کہ وہ اسرائیلی حملوں کے تباہ کن اثرات روکنے، فلسطینی شہریوں کے تحفظ اور بین الاقوامی قراردادوں کے مطابق امن قائم کرنے میں اپنا کردار ادا کرے۔

اجلاس میں کانگو اور روانڈا کے درمیان امن معاہدے کا خیر مقدم کیا گیا اور امید ظاہر کی گئی کہ یہ خطے کے استحکام اور عوام کی ترقی کا باعث بنے گا۔کابینہ نے حج کے موقع پر سلامتی، صحت اور تنظیم سے متعلق اعلی کارکردگی پر متعلقہ اداروں کو سراہا، اور حجاج خصوصا ایرانی زائرین کی دیکھ بھال کو اہم ترجیح قرار دیا۔

(جاری ہے)

اجلاس میں ریاض میں عالمی آبی تنظیم کے آغاز کو پانی سے متعلق عالمی تعاون اور چیلنجوں سے نمٹنے میں سعودی عزم کی علامت قرار دیا گیا۔

کابینہ نے سعودی عرب کو عالمی ادارہ صحت میں نائب صدر منتخب ہونے، اقوام متحدہ کی اعلی سطحی شماریاتی کمیٹی میں شمولیت اور عروق بنی معارض فطری ذخیرے کے سبز فہرست میں شامل ہونے کو بھی سراہا۔آئی ایم ایف کی رپورٹ میں سعودی معیشت کی لچک، غیر تیل شعبوں کی ترقی، مہنگائی پر قابو اور بے روزگاری کی تاریخی کم سطح پر پہنچنے کی تعریف کی گئی، جو وژن 2030 کے اہداف سے ہم آہنگ ہے۔اجلاس میں سمندری سیاحت کے ذریعے آنے اور جانے والے مسافروں کی بائیومیٹرک معلومات کے اندراج کے لیے ایک نیا طریقہ کار منظور کیا گیا۔کابینہ کی جانب سے سعودی وزیرِ صنعت کو پائے دار اقتصادی ترقی کے لیے صنعتی شراکت داری کے معاہدے میں شمولیت کے اقدامات مکمل کرنے کی منظوری دی گئی۔